Semana Oin PN Sei Debate Estensaun Estadu Emerjénsia
Naunil Media (Díli), Parlamentu Nasionál (PN) sei halo apresisaun no debate ba karta hosi Prezidente Repúblika Fracisco Guterres ‘Lú olo’ nian kona-ba estensaun Estadu Emerjénsia (EE)ba prevensaun no kombate COVID-19 iha Timor-Leste.
Relasiona karta hosi Prezidente Repúblika Fracisco Guterres ‘Lú olo’ nian kona-ba estensaun Estadu Emerjénsia (EE)ba prevensaun no kombate COVID-19. Sesta (24/04) ne’e, Parlamentu Nacionál hala’o kedas reuniaun líder bankada iha Sala Konferensia, iha ne’ebe lidera hosi Prezidente Parlamentu Nasionál (PPN), Arão Noé de Jesus da Costa Amaral, hodi deskuti no aprova ajendamentu deskusaun ba karta hosi Xefe Estadu Timor-Leste Lú Olo.
“Ami konvoka reuniaun líder bankada hodi halo apresiasaun ba karta Prezidente Repúblika nian atu estende Estadu Emerjénsia. Depois análize bankada sira hotu konkorda atu ajenda ba Segunda semana oin, tuku 10:00 dadér, komesa halo apresiasaun no debate iha plenária” PPN, Arão Noé de Jesus da Costa Amaral, ba jornalista sira hafoin prezide reuniaun líder bankada nian.
Xefe órgaun lejisladór ne’e hateten, maske data ba Estadu Emerjénsia dahuluk sei hotu iha Domingu (26 Abríl 2020), maibé implementasaun estadu emerjénsia kontinua hodi hein plenária deside destinu ba estensaun.
“Loloos ne’e iha Sábadu 25/04 atu halo plenária estraordinária, maibé deputadu sira barak mak ba foho. Entaun bele implika ba iha votasaun, tanba ne’e mak sujere debate ne’e muda ba iha Segunda semana oin”, fundamenta Arão Noe.
Deputadu Arão Noe, hateten “Primeiru Ministru, Taur Matan Ruak sei esklarese objetivu depois bankada sira idak-idak halo intervensaun durante minutu 30 kada bankada. Hafoin ne’e última palavra hosi Primeiru-Ministru, Taur Matan Ruak no ikus liu ba votasaun”.
Tuir PPN Arão Noe, katak lala’ok diskusaun la presiza diskusaun kle’an, tanba rejimentu parlamentu nasionál, hateten intervensaun kada bankada, la dehan kada deputadu.
“Agora bankada iha minutu 30 deit, bankada bele fó tempu ba bankada seluk ka fó ba nia deputadu seluk atu kompleta minutu ne’ebé prevé ona”. Dehan Nia. Ana
