COVID-19: Negosiante Sira Fa’an Na’an Iha Merkadu Taibesi La Folin
Naunil Média (Díli), Mosu Surtu COVID-19, nengosiante sira fa’an na’an iha merkadu Taibesi, sente triste tanba rendementu tun durante implementasaun Estadu Emerjénsia (EE).
Kestaun ne’e hato’o hosi negosiante fa’an na’an, José Da Silva Freitas, ba Naunil Media, iha Merkadu Taibesi, Sabadu (25/04).
Tuir José hateten, kompradór sira menus liu kompara ho fulan kotuk, tanba mosu COVID-19 iha Timor-Leste, hodi Prezidente Repúblika Fransico Guterres ‘Lú Olo’ dekreta EE iha loron 26 Marsu 2020 ba preprevensaun no kombate virus global ne’e.
“Ami nu’udar vendedór na’an iha Merkadu Taibesi, sente triste no lamenta tebes ba estadu emerjénsia, difikulta tebes ami-nia kompradór sira nia prezensa, hodi mai sosa na’an nune’e mós (langanan) sira hosi warun no Bakso la mai tanba Covid-19”, informa José.
Negosiante ne’e hatuir, seidauk mosu COVID-19, kada loron hetan rendementu U$ 100.00 dolar ba leten maibé implementa EE ne’e tun ba U$10.00.
“Rendimentu ne’ebé ami hetán agora ne’e tun tanba COVID-19, dekreta Estasdu Emerjénsia (EE). Sente triste bo’ot tanba loron ba loron mak ami hetan liu mak U$15.00 tun U$10.00”, negosiante ne’e espresa ninia sentiment triste.
Ikus liu, negosiante ne’e dehan, “dezafiu bo’ot ba ha’u tanba durante implementa EE, fa’an na’an mós la iha rendimentu no labele sustenta ba família uma laran nia nesesidade loro-loron nian”. Jjf
