Odete Viegas : “Chatbot Sei Fasilita Informasaun Kona-ba COVID-19 Ba Povu TL”
Naunil Media (Díli), Liuhosi Sala Situasaun, Porta voz Sentru Integradu Jestaun Krize (CIGC-Sigla Português), Odete da Silva Viegas, informa governu konstitusionál da-ualu liuhosi Ministériu Saúde (MS) hamutuk ho organizasaun Mundial Saúde (WHO-Sigla Ingles), sira lansa ona chatbot WhatsApp atu fornese informasaun loós, kredivel no atual ba povu durante surtu COVID-19 iha Timor-Leste (TL).
“Lansamentu chatbot ne’e parte hosi Ministériu Saúde nian esforsu ba intervensaun preparasaun no resposta ba COVID-19. Konteúdu ho informasaun ne’ebe atualiza hela deit ba chatbot ne’e fornese hosi Organizasaun Mundial Saúde no hosi Ministériu Saúde kona-ba notisias hosi rai laran, medidas prevensaun, síntomas no teste hodi komunidade bele aprende kona-ba oinsa atu proteje-an no proteje ita nia familia liuhosi liña chatbot”, dra. Odete da Silva Viegas, ba jornalista sira iha Centro de Convenções de Díli (CCD), Sábadu (25/04).
Odete da Silva Viegas, hatutan ho Chabot refere komunidade bele hetan dadus ikus-liu kona-ba númeru teste no kazu ikus liu iha Timor-Leste.
“Liña mensajen chatbot ne’e sei responde ba pergunta sira ne’ebe komunidade iha kona-ba prevensaun no boatos relasiona ho COVID-19. Atu uza liña chatbot ne’e, ba komunidade bele hakerek mensajen ‘Hello’ ba númeru telefone +670 75560000 no manda tuir WhatsApp”, esplika Nia..
Dra ne’e dehan, “Atu bele ajuda Ministériu da Saúde komprende diak liu-tan kona-ba implikasaun hosi pandemia COVID-19. Sei iha mos fitur ne’ebė rekolla informasaun ba sexu, idade no munisipiu ba usuariu ba liña chatbot ne’e. Informasaun sira ne’e sei ajuda Ministériu Saúde iha prosesu foti desizaun kona-ba resposta nasionál ba COVID-19”. Ana
