Fretilin, PLP no Khunto Lakon Konfiansa Ba PPN Arão Noe
Naunil Media (Díli), Bankada Parlamentár tolu kompostu hosi Partidu Frente Revolusionária Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO), sira deklara lakon konfiansa tomak ba Prezidente Parlamentu Nasionál (PPN), Arão Noé de Jesus da Costa Amaral, tanba ikus ne’e laiha konvokatóriu líder bankada hodi fixa ajenda ba plenária iha Parlamentu nasionál (PN).
Reprezentante Bankada Parlamentár tolu, atuál Vise Xefe Bankada PLP, Francisco de Vasconcelos, ba jornalista sira liuhosi Konferénsia Imprensa iha sala Bankada Fretilin, Parlamentu Nasionál, Kuarta (06/05).
Deputadu PLP, Francisco de Vasconcelos hateten, líder hosi bankada parlamentár tolu, PLP, FRETILIN no KHUNTO hakarak informa ba públiku tomak iha loron 5 fulan Maiu ne’e, hatama tiha ona pedidu ba meza Parlamentu Nasionál atu husu ajendamentu ba votasaun ba destituisaun Prezidente Parlamentu Nasionál (PPN), maibé seidauk iha ajenda.
“Pedidu destituisaun ida ne’e, ami hato’o tuir dalan rejimentu Parlamentu Nasionál nian iha artigu 16 alinea B kona-ba Destituisaun Prezidente Parlamentu Nasionál. Nu’udar membru parlamentu, ami lakon ona konfiansa ba señor Arão Noe nu’udar Prezidente Parlamentu Nasionál, tanba ikus ne’e laiha ajenda ba plenária”, hateten Nia.
Nia hatutan, “Bankada tolu sente lakon konfiansa no konsidera PPN dala barak liu ninia komportamentu la’ós hanesan Prezidente ba órgaun lejislativu. Maibé komporta liu fali hanesan nia Prezidente Bankada CNRT. Tuir Lei Organizasaun no Funsionamentu Administrasaun Parlamentár (LOUFAP) nian, Prezidente parlamentu nia kna’ar ida mak atu konvoka Konsellu Administrasaun Parlamentu nian, bainhira halo desizaun ruma kona-ba programa, polítika no rekursu parlamentu nian ligadu ba kestaun administrativu. Haluhan ona ne’ebé prezidente parlamentu viola tiha lei ida-ne’e la konvoka konsellu administrativu, maibé nia halo desizaun mesak deit”.
Francisco de Vasconcelos, dehan bankada tolu konsidera Prezidente Parlamentu Nasionál, Arão Noé nia hahalok hatudu tentativa atu paraliza Parlamentu Nasionál hodi labele funsiona ho normál.
“Ami deputadu sira hosi bankada tolu ne’e hato’o rekerimentu ba destituisaun Prezidente Parlamentu Nasionál nian ho intensaun ida de’it, atu Parlamentu Nasionál bele funsiona normál fila fali, hodi bele hala’o serbisu ba Estadu no Povu to’o ami-nia mandatu ramata” dehan Nia.
Deklarasaun polítika konjunta ne’e parte Bankada FRETILIN reprezenta hosi deputadu Francisco Miranda Branco, PLP nian reprezenta Vise-Xefe Bankada, Francisco de Vasconcelos, KHUNTO nian reprezenta hosi Deputada Olinda Guterres no Deputadu António Verdiál de Sousa. Ana
