La’ós Orientasaun Xanana Mak CNRT Sujere Ba PR Lú Olo Bolu Hamutuk FRETILIN-CNRT Solusiona Inserteza Polítika
Naunil Media (Díli), Konsellu Polítika Nasionál (CPN-Sigla Português) Partidu CNRT nian rezeita pozisaun deputadu sira bankada CNRT iha Parlamentu Nasionál ne’ebé husu Prezidente Repúblika (PR), Francisco Guterres ‘Lú Olo’ atu bolu partidu FRETILIN no CNRT tuur hamutuk, ne’e reprezenta no laiha orientasaun hosi lideransa partidu, Kay Rala Xanana Gusmão.
“Kona-ba asaun ba deputadu sira ami sei reune medida saida mak foti hodi husu responsabilidade ba deputadu. Ne’e hanesan aktus individuál. CPN deklara sei hola medida no husu responsabilidade ba deputadu CNRT sira ne’ebé hala’o konferénsia imprensa iha loron 5 Maiu 2020”, klarifika Vise-Prezidente Partidu CNRT, Virgílio Smith no akompaña hosi Adjuntu Sekretáriu Jerál Partidu CNRT, liuhosi Konferénsia Imprensa, iha Sede CNRT Bairro dos Grilhos, Díli, Kuarta (06/05).
CPN-CNRT, Virgilio Smith, hateten konsidera konferénsia imprensa ne’ebé Deputadu CNRT sira halo iha loron 5 Maiu 2020, iha Parlamentu Nasionál laiha orientasaun hosi partidu no konsidera deklarasaun hosi Deputadu CNRT sira nia hanesan atus individuál no la reprezenta partidu nia pozisaun.
CPN-CNRT reafirma, iha 30 Abríl 2020 atu fó apoiu tomak no autoriza Prezidente Partidu CNRT atu reprezenta CPN no partidu hodi hola medida no desizaun kona-ba situasaun polítika atuál nian pozisaun no apoiu tomak ba Petisaun ne’ebé hatama ona ba Supremu Tribunál Justisa ka Tribunál Rekursu (TR) iha loron 5 Maiu 2020.
Nia afirma, pozisaun CPN-CDN no estrutura nasionál to’o munisípiu ba Prezidente Partidu, Kay Rala Xanana Gusmão hodi reprezenta partidu bazeia ba desizaun CPN iha 30 abríl 2020.CPN reprezenta estrutura partidu nian tomak afirma nia konfiansa tomak no sein rezerva ba Prezidente CNRT, Kay Rala Xanana Gusmão.
“Kona-ba komunikasaun entre deputadu ho partidu la’o hela, so que sira hola inisitiva hodi halo konferénsia imprensa ne’e laiha orientasaun hosi partidu”, hateten Vise-Prezidente Partidu CNRT, Virgílio Smith. Ana
