La Autoriza Laen Toba Kolega Nia Uma, Feen Hetan Pankada

Fahe Tutan

Naunil Media (Díli ),  Arguidu ho inisial AS tuku RSP hanesan feen tanba la autoriza laen ba toba  iha kolega nia uma, no arguidu tenke ba hatan iha tribunal Distrital Díli (TDD) hafoin Ministériu Públiku (PM) akuza arguidu komete krime violénsia domestika ofensas integeridade fizíka simples ne’ebe previstu iha artigu 145 kódigu penal.   

Segunda (29/06) ne’e, iha sala julgamentu Tribunal lee sai   prova sira husi  arguidu ho lejada hanesan feen ho laen, maibé iha loron 02 fulan Setembru tinan 2019 iha suku Bairu Pité, arguidu husu lejada atu ba toba iha nia kolega nia uma, maibé lejada la hatan maka hamosu diskusaun entre arguidu ho lejada. Iha diskusaun ne’e    arguidu AS foti liman hodi tuku dala tolu ba lejada nia tilun-hun, tuku dala ida iha ibun, tuku dala rua iha kidan parte karuk, tuku tan dala rua iha kotuk laran no liki lejada monu tan ba rai maka tebe kona lejada nia hirus-matan, lejada sente moras maka’as hodi halai ba Sentru Saúde Vera Cruz hodi halo tratamentu.

Hatan ba ajukasaun ne’ebé maka Ministériu públiku akuza ba arguidu, katak faktu sira ne’e balun laloos, maibé depois hamosu dezentendementu sira sei hamutuk fali. Iha problema seluk ne’ebé maka arguidu komete tan, maka to’o agora sira devorsiu (fahe malu).

“Parte kidan ne’e laloos, maibé sira seluk ne’e loos hotu, baku tanba diskusaun no nérvoz.  Akontesimentu ne’e liu tiha fulan ida ami hamutuk maibé to’o problema ida fali dezembru ne’e  ami la hamutuk tiha”, hateten arguidu AS.

Lejada RSP esplika, arguidu la konsidera nia nu’udar feen hodi husu bainhira atu ba fatin ruma, maibé nia husu fali ba nia-inan, ho ida ne’e maka hamosu dezentendimentu entre feen no laen.

“Atu ba toba iha Kos, ha’u husu nia, maibé nia la ko’alia no la husu ba ha’u maibé nia husu fali ba nia-ama, ne’e maka ha’u dehan, ó hola fali ó nia-ama, ne’e maka nia tama kuartu laran tebe ha’u dala rua, tuku dala barak. Akontesimentu ne’e kleur tiha maka ami di’ak malu fali no nia lori ha’u ba fali nia-uma, maibé akontesementu seluk ami la hela hamutuk ona”, Haktuir RSP.  

Ministeriu públiku nia alegasaun, arguidu rekuiñese nia hahalok katak prova sira ne’e loos hotu, maibé tuku iha parte kidan ne’e maka laloos, arguidu komete duni krime violénsia doméstika ofensas integridades fizika ne’ebé maka previstu iha artigu 145 kodigu penal. Krime ida ne’e nia natureza aas, tanba ne’e maka Ministériu Públiku husu ba tribunál atu kondena arguidu ho pena suspensaun maibé tuir konviksaun tribunál nian.

Parte defeza mos husu ba tribunál fó kastigu ida ne’ebé maka adekuadu ba arguidu, maibé kazu ne’e tribunál sei hadia fali iha loron 03 fulan Jullu tinan 2020 tuku 04 lokraik  hodi rona desizaun final.

Iha audensia julgamentu ne’e prejide husi juíz singular Ivan Suritai, Ministériu Públiku reprezenta husi Prokuradór Jerál Gustavo da Silva no arguidu AS hetan asistensia legál husi Jonas Henrique. Rit

Leave a Reply

Your email address will not be published.