Suku Leimea Sorin Balu Halerik Enérjia Eletrisidade Dezde Okupasaun Indonézia To’o Independensia
Naunil Media (Ermera), Komunidade uma-kain 995 iha Suku Leimea Sorin Balu, Postu Administrativu Hatulia, Munisípiu Ermera, halerik ba enérjia eletrisidade dezde tempu okupasaun Indonézia to’o ohin loron, maske Timor-Leste selebra ona nia-restaurasaun Independensia ba dala-XXI (20 Maiu 2002 – 20 Maiu 2020).
Preokupasaun ne’e Xefe Suku Leimea Sorin Balu, Leonel dos Santos, informa ba jornalista Naunil Media, hafoin partisipa programa formasaun organiza husi Instito Defesa Nacional (IDN) hala’o iha Centro de Convenções de Díli (CCD), Kuarta (23/12).
“Duarante ha’u nia mandate, dezenvolvimentu iha Suku Leimea Sorin Balu ladún la’o, liu-liu enérjia eletrisidade laiha, kondisaun estrada ladi’ak” informa autoridade suku Leimea Sorin Balu, Leonel.
Ho kondisaun ne’e, komunidade sira tenki hola rasik painel solar atu asesu naroman no ba oan sira estuda iha tempu kalan, maibe la’os komunidade hotu-hotu.
“Tinan barak ona komunidade sira uza de’it Painel Solar, maibe la aguenta to’o tempu naruk. Kondisaun ida ne’e prejuka tebes ba komunidade, susar tebes ba oan sira atu estuda iha tempu kalan. La’os 100%, komunidade uza painel solar, ba sira ne’ebe laiha kbi’it, pasiensia tenki nakukun lalan”, aprofunda xefe suku ne’e.
Nia husu ba Governu konstitusionál da-ualu, liu-liu Ministériu ne’ebe tutela atu fó atensaun ba seriu ba preokupasaun ne’e hodi hasai sira hosi nakukun laran.
Suku Leimea Sorin Balu, kompostu husi Aldeia rua (2) Leodato ho Leimea Sorin Balu ho total Uma-kain 995. Dms
