UPM Kaptura Sidadaun Indonézia Ida Peska iha Área Tasi TL
Naunil Média (Bobonaro), Polísia Nasionál Timór-Leste (PNTL) liu hosi Unidade Polísia Marítima (UPM), kaptura sidadaun Indonézia mane na’in 1 iha Palaka ne’ebé halo atividade peska ilegál iha área tasi Timor-Leste.
Tuir Komandante Munisípiu Bobonaro, Superintendente Polísia Antonio Mauluta, Informa horikalan UPM hala’o patrullamentu iha área Atabae nian no iha tuku 02:19 madrugada konsege detein peskadór ilegál mane na’in 1.
“Horikalan UPM hala’o patrullamentu iha área Atabae nian no iha tuku 02:19 madrugada konsege detein peskadór ilegál mane na’in 1, iha ho naran inisiál HR, tinan 49, hela iha Fatuluka-Atambua, RT, 004 RW 002, Suku Jenilu, postu administrativu Kakuluk Mesak, Munisípiu Belu-Atambua”, dehan Komandante Munisípiu Bobonaro, Superintendente Polísia Antonio Mauluta ba jornalista sira via telefone iha segunda kalan, (14/02).
Nia hatutan, Kapturasaun sidadaun Indonézia ne’e hamutuk ho evidénsia ró ida tipu Fiber Glass modelu Nautilus ne’ebé suspeitu sosa husi produsaun rai laran iha Bidau-Díli.
“Hafoin foti identidade Komandante Postu UPM Atabae entrega kedas sidadaun Indonézia ne’e ba Eskuadra PNTL Atabae, no agora dadaun halo koordenasaun ho parte saúde hodi haree asuntu saúde ba prevensaun Covid-19 nian”, nia informa.
Depois sei enkamiña ba Ministériu Públiku no sei iha koordenasaun ho Diresaun Jerál Servisu Migrasaun hodi prosesa tuir Lei Imigrasaun no Ázilu númeru: 11/2017, dehan nia.
PNTL Munisípiu Bobonaro nafatin servisu hamutuk ho Unidade Fronteira no Unidade Marítima hodi asegura fronteira no sei latolera ameasa saida de’it mak hasoru soberania nasionál no riku soin iha tasi no rai maran, nia hakotu. Ana
