Kandidatu Luis Alves Tilman seidauk prienxe rekezitu, lapasa iha TR

Naunil Media(Díli), Kandidatu ba Prezidente Repúblika (PR) Luis Alves Tilman, ne’ebé maka lapasa iha Tribunál Rekursu(TR) hafoin submete dokumentus, tanba seidauk prienxe rekezitus ne’ebé maka lei haruka.

Tuir Prezidente Tribunál Rekursu, Deolindo dos Santos hateten, fó sai notifika durante loron sanulu nia laran, Tribunál Rekursu halo verifikasaun ba lista kandidatura ne’ebé sei kompete iha Eleisaun Prezidensial hamutuk nain sanulu resin hitu (17).

“Ohin Tribunál Rekursu fó sai kandidatu nain Sanulu resin neen (16) maka admitidu ona ka passa iha rejultadu verifikasaun dokumentus ne’e. Entertantu Kandidatu Luis Alves Tilman lá passa tanba, seidauk prenxe rekezitus iha TR ne’ebé lei haruka, Tanba ho lista proponentes husi Munisipiu 3 lá tuir rekezitus ne’ebé TR fó sai,”dehan Prezidente Tribunál Rekursu, ba jornalista sira, iha kaikoli, Segunda Feira,(14/02).

Nia hatutan, Tribunál Rekursu fó notifikasaun ba kandidatura hotu atu kompleta, maibé to’o ikus desizaun anunsia kandidatu ne’e, la admite tanba iha irregularidades ne’ebé nia enfrenta.

“Husi Prosesu lista kandidatura nain 17 ne’e, Ami detekta irregularidades lubuk ida durante prosesu verifikasaun dukumentus hanesan, falta númeru proponentes ne’ebé lá to’o, falta dokumentus ne’ebé autotentikadu , falta kartaun Eleitoral ne’ebé lei husu, maka Tribunál Rekursu halo konvite no bolu sira atu mai kompleta sira-nia dokumentus hotu, no to’o ohin desizaun sai, kandidatu hotu mai kompletu.

Entre ho sira ne’e, só Ida-de’it maka la kompleta duni dokumentus no la prense kritéria maka kandidatu Luis Alves Tilma”, Deolindo esplika.

Orgaun Judisial ne’e haktuir, maske kandidatura ne’e, rejistu iha TR ho proponentes liu husi rihun lima, maibé Lá prienxe rekezitus husi TR ne’ebé lei haruka katak, kada Munisipiu ida tenke rejistu proponentes nain atus ida (100).

“Maibé iha Munisipiu 3 hanesan Viqueque, Liquiça no Manufahi maka nia la konsege Kompleta rekezitus ka proponentes lá to’o atus ida, tan ne’e maka nia la admitidu.

Ha’u dehan, Tribunál Rekursu nafatin fó tempu ba  kandidatura Luis Alves Tilman, atu bele submete hikas nia dokumentus hodi kompleta iha TR ho prazu loron ida, hahú segunda ohin to’o aban Tersa loron 15 Fevereiro, oras tuku Lima Loraik. Aban tuku lima maka nia Submete ona, entaun ami-nia desizaun ne’e ba ona difinitivus, Se nia rekore duni maka husi Tribunál koletivus Juis nain 3 sei hare fila-fali desizaun ne’e, iha Loron rua nia Laran, depois desizaun hotu maka ita hasai lista definitivus molok tama iha prosesu Sorteiu nian,” Prezidente TR deklara.

Entertantu, kandidatu ne’ebé Admitiu ona Konkore iha Eleisaun Prezidensial tinan ne’e, Kandidatu Independente, Ângela Freitas, Martinho Gusmão, Milena Pires, Rogério Lobato, Felizberto Araújo Duarte, Lere Anan Timur, Hermes Correia Sikiliras, Virgilio Guterres, Isabel Ferreira, Antero Bendito da silva, Constâncio Pinto, no Kandidatu husi Partidu, Armanda Berta do Santos (KHUNTO), Francisco Guterres Lú Olo (FRETILIN), Anacleto Bento Ferreira (PDRT), José Ramos Horta (CNRT),no Mariano Assanami Sabino (PD). Ana