Aban Coliati ba Fitun Rua, Klamar Fuik ba Fitun Ida

Naunil Media (Díli), Prezidente Repúblika (PR) Francisco Guterres “Lú Olo”, aban 15 fevereiru sei fó posse ba Brigadeiru-Jenerál Calisto dos Santos Coli “Coliati” hodi sai hanesan Vise-Xefe Estadu-Maiór-Jenerál Forsas Armadas no Komodoru Donaciano Costa Gomes Pedro “Klamar Fuik” hodi asumi knaar hanesan Xefí Estadu-Maiór Forsas Armadas.

“Iha serimonia ne’ebé sei realiza tuku 10:00 Otl, iha Palásiu Prezidénsiál Nicolau Lobato ne’e, sei promove mós deviza Brigadeiru Jenerál Calisto dos Santos Coli “Coliati” ba Majór-Janerál, enkuantu  Komodoro Pedro Klamar Fuik mantein nafatin ho deviza atuál, ne’ebé permite ona nia atu asumi knaar hanesan Xefí Estadu Maior Forsas Armadas,” dehan liu husi Komunikadu ne’ebé Naunil Média asesu iha média Prezidensiál Repúblika, Segunda (14/02).

Tuir Lei Defeza Nasional Vise-Xefí Estadu-Maiór-Jenerál Forsas Armadas no Xefí Estadu-Maiór Forsas Armadas, nomeia husi Prezidente Repúblika tuir proposta Governu ne’ebé antes rona uluk Konsellu Superior Defeza Militar no Konsellu Superior Defeza Seguransa, liu husi membru Governu ne’ebé iha kompetensia ba matéria defeza.

Vise-Xefí Estadu-Maiór Jenerál Forsas Armadas foun, Brigadeiru Calisto Coli “Coliati”, ne’ebé moris iha Darulete, Liquiça, tinan-62 liu ba, antes ne’e asumi knaar hanesan Xefí Estadu-Maior Forsas Armadas no iha mós esperiénsia nu’udar Adidu Defeza Timor-Leste iha Australia, husi 2014 to’o 2018.

Enkuantu Komodoru Donaciano  Costa Gomes “Pedro Klamar Fuik”, moris iha Hatulia, Ermera tinan-53 liu ba, iha tinan-10 ikus, hala’o knaar nu’udar Diretór Institutu Defeza Nasionál Timor-Leste. Komodoru Pedro Klamar Fuik mós iha esperiénsia lidera Komponente Naval  F-FDTL husi 2008 to’o 2011. *Jos