Ezekusaun OJE 2021 Atinji Pursentu 50(%) Maibe Povu Sei Nafatin Halerik

Naunil Media (Díli), Mesmu VIII Guvernu konstitusionál da’ualu ezekuta ona Orsamentu Jerál Estadu (OJE) 2021 atinje ona pursentu 50(%) maibé povu sei halerik hela.

Vice Diretór Yayasan HAK, Filomena B. dos Reis, hato’o lia hirak ne’e ba jornalista sira iha nia knaar fatin, Farol, Tersa (21/09).

“Ezekusaun orsamentu ne’e la’o halo nusa dezenvolvimentu la’o mak ida ne’ebé saida mak VIII guvernu konstitusionál atinji ona para dehan katak ezekusaun orsamentu ne’e too ona 50 % ida ne’e mak ita hakarak ita ko’alia kona-ba edukasaun, ita ko’alia kona-ba saúde ita ko’alia kona-ba agrikultura no wainhira ita haree povu halerik hela”, dehan Vice diretór Yayasan HAK

Vice diretór ne’e hatutan ne’e pergunta boot ida bele deklara númeru orsamentu maibé laharee ninia rezultadu ne’ebe mak atu afirma katak ezekusaun ne’e la’o duni hanesan ne’e.

Filomena hateten haree ho orsamentu ne’ebé mak boot maibé laiha dezenvolvimentu tanba inundasaun ne’ebé akontese desde iha fulan Abríl maibé too agora vitima balun sei Okupa eskola no mós iha lona okos.

“Absolutamente tanba ita bele haree kedas katak iha fulan Abríl ita haree liu-liu ba iha inundasaun ne’ebé ke afeta povu tomak iha Timor-Leste  i too agora de’it ita haree katak sei iha komunidade balun ne’ebé mak Okupa nafatin eskola balun sei iha lona okos”, tenik Filomena

Nia afirma atu dehan guvernu halo dezenvolvimentu ka oinsá ne’ebé ko’alia fízika dehan katak ezekuta ona 50 % maibé rezultadu hatudu oinsá

“Wainhira ita atu hateten katak orsamentu ne’e atinze ona 50 % mós tenke iha netik nia rezultadu ne’ebé hatudu la barak liu mais pelumenus iha kuarenta ka trinta ka vinte cinco pursentu hatudu katak iha duni dezenvolvimentu”, nia afirma

Nia dehan atu ko’alia liu kona-ba nesesidade bázika guvernu halimar hela de’it konfinamentu la’o hela de’it halo nusa mak atinjimentu ida ne’e too iha ne’ebá.

Antes ne’e Primeiru Ministru Taur Matan Ruak (TMR) mós deklara katak ezekusaun orsamentu jerál estadu (OJE) 2021 ne’e atinje foin 50 % tanba situasaun Covid no konfinamentu obrigatoriu.

“Ezekusaun orsamentu 2021 nian ita foin atinje 50 % ho situasaun Covid no konfinamentu obrigatoriu difikuldade sira ne’ebé ita hetan 50 % espera katak fulan hira mai ita halo esforsu para halo ezekusaun ezekuta ita nia orsamentu, Mas sira ne’ebé labele ezekuta naturalmente fila ba kofre estadu sei lalakon”,dehan Chefe Guvernu Taur Matan Ruak. Jos