TR Deolindo: PR Lú Olo Husu Tribunal Halo Justisa Sem Haree Ba Kór
Naunil Média (Dili), Prezidente Repúblika (PR), Francisco Guterres “Lú Olo” husu ba tribunal atu bele funsiona ho forma ne’ebé di’ak nune’e bele fo justisa ba povu tomak sem haree ba kór.
Lia menon xefe estadu nian ne’e transmite husi Prezidente Tribunal Rekursu Deolindo do Santos ba Jornalista sira hafoin remata enkontru ho Prezidente Repúblika iha, palásiu Prezidensiál Nicolau Lobato Bairru Pite, Tersa, (17/05).
“Lia menon husi Prezidente Repúblika katak husu ba tribunal sira atu bele funsiona ho forma ne’ebé di’ak nafatin para atu bele fo justisa ne’ebé ke di’ak ba povu Timor tomak hotu i sem haree ba kór ema ida-idak ninian,” dehan PTR Deolindo do Santos
PTR hatutan Prezidente Repúblika mós husu katak atu konsellu Superior majistratura judisial atu bele halo esforsu ne’ebé di’ak liu tan para atu kria tan kondisaun di’ak ba juiz sira no mós ba ema sira ne’ebé serbisu iha tribunal para nune’e atu bele fornese servisu di’ak liu ba povu Timor tomak.
Prezidente Tribunal Rekursu ne’e mós esplika katak enprinsipiu servicu tribunal la’o hanesan baibain diak, ate di’ak liu tan atendementu ne’ebé tribunal halo espesialmente iha tribunal balun ne’ebé ke nia prosesu ne’e la’o kapás no bele dehan katak extra ordinariu
“Ha’u fo ezemplu ida katak iha tribunal Dili ita iha tinan rua tolu liu ba ne’e iha kuaze tres mil i tal prosesu krime dois Mil i tal prosesu sivil agora ita iha Mil duzentus i tal prosesu krime i seissentus i tal prosesu sivil ida ne’e mundasa ne’ebé ke extra ordinariu,” katak Prezidente Tribunal Rekursu
Nia dehan esforsu ne’ebé nu’udar Prezidente Tribunal Rekursu no mós envolvementu konsellu majistratura judisial ne’ebé foti desizaun balun ne’ebé fasilita para atu bele dudu Juiz sira ofisiál justisa sira ho funsionáriu sira servicu ne’ebé di’ak liu tan.*Jos
