PR Lú Olo: Konstituisaun La’ós Bíblia, Iha Tempu Para Halo Revizaun

Naunil Media (Díli), Prezidente Repúblika (PR), Francisco Guterres “Lú Olo” hateten Konstituisaun Repúblika Demokrátika Timor-Leste (KRDTL) la’ós Bíblia ne’ebé hela metin, maibé iha tempu no iha periodu para halo revizaun.

Xefe estadu hato’o lia hirak ne’e ba Jornalista sira hafoin remata halo abertura ba semináriu 20 anos da Konstituisaun Repúblika Demokrátika Timor-Leste, iha Salaun do Ministeriu das Finansas, Aitarak laran, Tersa, (17/05).

“Ha’u hakarak hateten mós iha ha’u nia diskursu katak iha lakunas barak mak se karik nota iha semináriu ida ne’e ou bele deskobre lakunas ruma iha ita nia konstituisaun naturalmente ita nia konstituisaun la’ós Bíblia be hela metin iha tempu, iha periodu para halo revizaun ne’e liu husi sorumutu ida ne’e, sé karik detekta naturalmente orgaun kompotente hanesan guvernu hanesan, Parlamentu sira iha kompetensia rasik para atu halo revizaun ba konstituisaun hodi hadia di’ak liu tan”, dehan xefe estadu.

PR hatutan maibé, atu halo revizaun ba konstituisaun presiza haree katak materias balun ne’ebé mak iha konstituisaun labele book hanesan forma Repúblika estadu nian ida ne’e labele bo’ok, prinsipiu separasaun de poderes ne’e mós labele bo’ok.

Lú Olo esplika,  Ida seluk tan mak iha estadu ida kuandu iha estadu emerjencia ka estadu de sitiu ne’e mós Parlamentu Nasionál labele halo revizaun ba konstituisaun.

Nia dehan,  Purtantu halo revizaun ba konstituisaun tenke respeita prinsipiu materiais ne’ebé mak tau iha konstituisaun ho prinsipiu temporais nian katak ho tempu ne’ebé mak bele ou tempu ne’ebé mak labele. *Jos