Oknum Polísia Militar no Veteranu Balun Tiru Komunidade Nia-Karau Iha Manufahi
Naunil Media (Díli), Kuarta (13/9/23), ne’e Movimentu Estudante Joventude Munisípiu Manufahi (MEJMM), realiza komunikadu imprensa hodi kondena oknum membru Polísia Militar (PM) no Veteranu balun uza Armas estadu (Kilat) hodi tiru mate kominidade nia-Karau iha Muniípiu Manufahi.
Porta-voz Antonio Rebelo Mendes, deklara MEJMM lamenta tebes ho aktus hirak ne’ebé mak akontese hodi hamate komunidade sira nia-Karau iha Suku Betanu, Aldeia Selihasan, no Komunidade sira kaer toman iha dia 10 fulan Setembru ne’e mais ou menus oras tuku 04:20 madrugada, iha dalan kruzamentu Entre Mota kelan no Feriksare.
“Tuir Informasaun no kronolojia ne’ebé mak iha katak, aktu ba uzu kilat ka arma pezada ba kasa ou tiru komunidade nia animal hakiak ne’e la’ós foin mak akontese, maibe dala ne’en (6) ona. Ho nune’e obriga karau na’in sira kalan-kalan tenke ba toba hein karau iha karau luhan”, haktuir porta-voz ne’e, iha CNJTL, Farol.
Nia hatutan, “Tamba ne’e ami husi Movimentu EstudanteMunisípiu Manufahi, ami kondena no lamenta tebes ho aktu ne’ebé mak komete husi oknum Polísia Militar ho Veteranu balun ne’ebé mak oho komunidade nia-karau”.
Porta-voz ne’e, dehan tuir informasaun husi komunidade, oknum veteranu mak sai matadalan ba Polísia Militar hodi oho komunidade nia-karau.
Movimentu estudante no juventude Manufahi konsidera Guarda florestas iha muníspiu refere la profisioinal hodi halo prevensaun ba kasa ilegal sira uza tempu kalan hodi oho povu sira nia-animal no animal fuik sira.
Movimentu ne’e husu husu Orgaun no Instituisaun relevante sira hanesan Prezidente Republika (PR), Komandu FALINTIL-Forsa Defeza Timor-Leste (F-FDTL), Parlamentu Nasional (PN), Provedoria dos Direitu Umanus no Justica ( PDHJ), no Konsello Veteranus Timor-Leste atu halo investigasaun ba Membro Polísisa Militar no Membru veteranus ne’e. Gyor/Mj1
