COVID-19 Iha TL : Kazu Komfirmadu Mantein 24 no Rekuperadu Nain 23
Naunil Media (Díli), Porta voz Sentru Integradu Jestaun Krize (CIGC-Sigla Português) dr. Rui Maria de Araújo, informa Surtu Corona Virus Desease 2019 (COVID-19) iha Timor-Leste (TL) rekuperadu hamutuk nain 23 no kazu komfirmadu sei mantein 24.
Porta Voz CIGC, dr. Rui Maria de Araújo, ba jornalista sira liuhosi komunikadu imprensa iha Sala Situasaun Centro de Convenções de Díli (CCD), Kuarta (13/05).
“Ohin, kazu foun la iha, rekuperadu aumenta nain 1. Totál kazu konfirmadu nafatin nain 24, hosi nain 22 iha loron hirak liu-bá hamutuk kazu rekuperadu ohin nain 23. Hosi kazu nain 23 ne’e nain 19, hosi kazu konfirmadu nain 4 husi kazu sira ne’ebé provavel, ema nain 5 mak sei iha fatin izolamentu Vera Cruz”, informa dr. Rui.
Eis Ministru Saúde esplika, totál amostras hosi triajen ba munsípiu sira durante ne’e rekolla hodi halo ezame iha laboratorium hamutuk nain 1120, hosi teste rezultadu negativu hamutuk nain 822.
“Aproveita atualiza mos dadus kona-ba análiza laboratóriu ne’ebé ita halo durante ne’e, total amostras ne’ebe ita rekolla ba halo ezame laboratóriu to’o ohin tuku 12:00 otl hamutuk nain 1120, sira ne’ebe rezultadu negativu 822, sei hein rezultadu hamutuk nain 274”, esplika Eis Primeiru Ministru (PM), Riu.
Enkuantu dadus kona-ba konfinamentu obrigatóriu ema ne’ebe iha kuarentena to’o ohin Kuarta 13/05 ne’e, tuku 12:00 otl, hamutuk nain 87, auto-kuarentena nain 3, sira seluk kuarentena iha fasilidade governu nian. Totál ema ne’ebé sai ona kumulativu hamutuk nain 2181, hosi munisípiu nain 478 no iha Díli hamutuk nain 1703. Apm
