COVID-19 Iha TL: MS Kontinua Rekolla Amostra To’o Iha Baze
Naunil Media (Díli), Porta Voz Sentru Integradu Jestaun Krize (CIGC-Sigla Português), dr. Rui Maria de Araújo, hateten atu hatene transmisaun lokál Surtu Corona Virus Desease 2019 (COVID-19), mak Ministériu Saúde (MS) hamutuk ho ekipa saúde, sira kontinua rekolla amostra to’o iha baze hodi indentifika moras global ne’e.
Porta Voz CIGC, dr. Rui Maria de Araújo, ba jornalista sira liuhosi komunikadu imprensa iha Sala Situasaun Centro de Convenções de Díli (CCD), Kuarta (13/05).
“Ohin loron Ministériu Saúde liuhosi fasilidade saúde sira sei rekolla nafatin amostra, nune’e buka evidensia kona-ba transmisaun lokál iha komunidade sira nia leét”, hateten Porta Voz, dr. Rui Maria de Araújo.
Eis Ministru Saúde ne’e informa, transmisaun lokál to’o oin loron seidauk hetan evidensia ruma kona-bá kazu COVID-19, maibé la’ós signifika moras ne’e laiha ona.
“Ohin, ita seidauk hetan evidensia sira ne’e, maibé ne’e la signifika katak moras ne’e la iha ona iha ita nia le’ét, tanba ita hotu hatene risku bo’ot tebes ba ema sira ne’ebe iha moras ne’e iha sira nia isin, maibé la hatudu sintomas ka asintomatiku”, teniak Nia.
Ikus, nia husu, “Tanba ne’e, ita presiza atensaun hodi hatudu disiplina nafatin, partisipa kolabora nafatin ho medidas ne’ebé estadu impoen liuhosi estadu emerjénsia ne’e”. dehan dr. Rui. Pau
