Arão Noé Kontinua Hein PR Lú Olo Disolve PN

Naunil Media (Díli), Prezidente Parlamentu Nasionál (PPN), Arão Noé de Jesus da Costa Amaral, hateten nia kontinua hein Prezidente Repúblika (PR), Francisco Guterres ‘Lú Olo’ atu dissolve Parlamentu Nasionál (PN), tanba PN hasoru ona krize institusionál, nune’e laiha dalan ba destituisaun.

Xefe órgaun legisladór, Arão Noé, reafirma pozisaun hanesan deklarasaun iha loron 11 Maiu ne’e ba públiku relasiona ho situasaun polítika atual iha rai-laran.

“Konstituisaun RDTL Artigu 86 (f) koalia kona-ba kompetensia Prezidente Republika nian deskreve, katak hakotu ka disolve Parlamentu Nasional, iha kazu krize bo’ot institusional nian ne’ebe labele iha formasaun governu ka aprovasaun orsamentu jerál estadu nian. Iha tempu naruk liu loron neén-nulu, wainhira rona tiha ona partidu politiku sira ne’ebe hetan kadeira iha parlamentu nasional, no rona Konsellu Estadu,” esplika PPN, Arão Noé, Kinta (14/05).

Deputadu ne’e haktuir “Bazeia ba Konstituisaun Repúblika Demokrátika Timor-Leste Artigu 86 (f) iha loron 10 Fevereiru 2020 Sua Exelensia Prezidente Republika konvoka reuniaun Meja Redonda hodi hamosu opsaun 3, inklui opsaun ida ba partidu polítiku sira hodi halo movimentu politika hodi forma governu foun”.

Tuir deputadu Arão, katak prazu loron neen-nulu tuir KRDTL Artigu 86 (f) sura husi loron 17 Janeiru 2020 to’o 17 Marsu 2020, situasaun atual hatudu katak iha ona loron 14 Maiu 2020 La iha Partidu ka Koligasaun ne’ebe Forma Governu Foun ka Aprova Orsamentu Jeral Estadu tuir rekizitu KRDTL Artigu 86 (f).

“Ida ne’e hatudu katak ita ultra-pasa tiha ona prazu loron neen-nulu ne’ebe temi iha KRDTL Artigu 86 (f). Tanba ne’e Parlamentu Nasional V Lejizlatura hein de’it disolusaun hosi Sua Exelensia Prezidente Repúblika tuir Konstituisaun haruka”, tenik Arão.  

Nia konsidera katak, laiha ona dalan ba Deputadu sira atu Rekere Distituisaun ba Prezidente Parlamentu Nasional ao mezmu tempu laiha ona fatin ba plenária.

Nia argumenta, karta rekererimetu ne’e ne’ebe PLP, FRETILIN no Khunto submete mos kontra rejimentu Parlamentu Nasional nian artigu 17, tanba sira diriji fali ba Vise Prezidente Parlamentu Nasionál.

“Hau, Prezidente Parlamentu Nasional kompremetidu atu kompre KRDTL Artigu 2 (2) katak Estadu Hakruuk ba lei Inan no Lei Oan sira, tanba ne’e hau husu ba orgaun estadu atu ita hotu-hotu hakruuk deit ba Lei Inan ka Konstituisaun”. dehan Nia. Ana