Semana Oin EE Daruak Ramata, PR Lú Olo : “TL Seidauk Hases Hosi COVID-19”

Naunil Media (Díli), Prezidente Repúblika (PR), Francisco Guterres ‘Lú Olo’, hateten implementasaun medida estadu emerjénsia (EE)  ba daruak nian sei remata semana oin remata, maibé Timor-Leste seidauk hases hosi virus COVID-19 tanba la iha vasina.

Xefe Estadu Timor-Leste, Francisco Guterres ‘Lú Olo’, ba jornalista sira liuhosi nia deskursu iha ambitu selebrasaun independensia ba dala 18 nian, iha Palásiu Prezidente, Bairru Pité, Kuarte (20/05).

PR Lú Olo hatete, iha loron 27 fulan Marsu 2020, dekreta Estadu Emerjénsia ba fulan ida, liuhusi autorizasaun Parlamentu Nasionál  (PN) nian. Liu tiha fulan ida,  renova fali Estadu Emerjénsia. Ho estadu emerjénsia ne’e fó biban ba  sistema saúde nasionál hodi hasoru COVID-19.  

“Governu foti medida oi-oin, inklui taka fronteira no harii fatin ba kuarentena no ba izolamentu, enkuantu ekipa oi-oin hanorin ita-nia ema oinsá hasees-an hosi moras COVID-19. Semana oin, Estadu Emerjénsia ba daruak sei ramata, maibé ha’u hakarak fó hanoin fila-fali, alerta ne’ebé Organizasaun Mundiál Saúde fó-sai, katak vírus corona ne’e sei lalakon iha tempu badak. Ita tenke matan-moris, liu-liu tamba seidauk iha vasina atu ida-idak bele hasees-an hosi moras COVID-19”, dehan Aman Nasaun núdar Simbolu Unidade Nasionál, Lú Olo.

Eis gerileiru no atua Prezidente Repúblika, Lú Olo akresenta, esforsu ne’ebé governu halo hodi foti medida oi-oin, inklui taka fronteira no harii fatin ba kuarentena no ba izolamentu no eduka povu hodi hadók hosi   moras COVID-19.

“To’ o ohin loron ita seidauk rejista, iha ita-nia rai kazu ruma ne’ebé mate tanba COVID-19”, realsa Xefe Estadu TL, Lú Olo.

Xefe estadu Ne’e akresenta liu-tan,“Governu daualu ne’ebé lidera hosi  Primeiru-Ministru (PM), Taur Matan Ruak halo esforsu konsertadu no servisu hamutuk ho instituisaun hotu-hotu, tékniku Timor-oan sira no internasionál, konfisaun relijiozu hotu, sosiedade sivíl tomak no Povu en-jerál hodi prevene moras COVID-19 la hada’et ba ita-nia populasaun. Susesu iha faze ida ne’e fó orgullu ba ita hotu timoroan ne’ebé hadomi ita-nia Rai no ita-nia Povu”.

“Maski iha faze ida ne’e ita konsege salva vida Povu nian, maibé ita-nia ekonomia laburas. Ha’u konsiente katak ita-nia atividade ekonómika ladún la’o, ita-nia produtu internu brutu mós tun. Relatóriu anuál hosi ita-nia Banco Central fó-sai katak ita-nia ekonomia hahú sa’e uitoan iha tinan kotuk maibé, iha tinan ida ne’e, tun ba pursentu ida (1%)”. dehan PR Lú Olo. Dms