Khunto Lakohi Mudansa Radikal Iha PN, Subtitui Sekretária Meza Presiza Komunika CNRT no UDT/FM
Naunil Media(Dili), Segundu Vise Prezidenti Parlamentu Nasionál, Luis Roberto, hateten atu subtitui Sekretária ho Vise Sekretáriu Meza Parlamentu Nasionál (PN) nian, bankada tol, Fretilin, PLP no Khunto presiza halo komunikasaun ho partidu CNRT no UDT/ FM, tamba dadaun ne’e sekretária meza PN sei asume hosi deputada CNRT ida no FRENTI MUDANSA ida.
Segundu Vise PPN, Luis Roberto, ba jornalista sira iha resintu PN, Sesta (22/05).
“Tuir Khunto nia haree, ita presiza haree lai hodi liga ho bankada CNRT nian ne’ebé mak durante ne’e asume sekretária meza no bankada UDT/FM mos asume kargu nu’udar vise-sekretária. Tanba ne’e, ita presiza halo komunikasaun ho sira, mantein ka halo mudansa, ita presiza halo komunikasaun. Tanba tempu to’o ona ita kopera hamutuk, halo mudansa radikál ba parlamentu mos ladún di’ak. Labele dehan FRETILIN, KHUNTO no PLP mak domina buat hotu iha parlamentu idane’e, ne’e KHUNTO lakohi”, dehan Segundu Vise PPN Luis Roberto ba jornalista sira iha resintu PN.
Tuir deputadu ne’e, katak atu halo mudansa presiza halo komunikasaun ba malu, tamba maluk balun servisu kleur ona núdar sekretária meza no vise sekretária.
“Ha’u-nia hakarak ne’e haree mos ba maluk sira-ne’ebé mak servisu kleur ona hanesan asume kargu sekretária meza no vise-sekretária meza. Ita presiza halo komunikasaun molok ita halo mudansa. Se sira hakarak mantein ita atu halo nusá, ita labele haree deit ba partidu A ka B maibé presiza kopera hamutuk hodi asume responsabilidade mandatu tinan rua ho balun nia laran”, Tenik deputadu hosi Khunto ne’e.
Nia subliña, to’o oras ne’e Khunto seidauk iha proposta ruma atu tuur iha sekretária, vise-sekretária no prezidente komisaun espesializada sira iha parlamentu nasionál.
“Ami seidauk iha kandidatu ruma atu ba tuur iha kargu ida-ne’e no kargu ida ne’ebá, ami mantein nafatin pozisaun ida, bainhira iha mudansa ba mak presiza ami prinxe, entaun ami prontu. KHUNTO nia hakarak loloos ne’e parlamentu ida ne’e ita presiza kopera hamutuk ho bankada hotu-hotu i tempu ona kria unidade nasionál. Ita lalika radikál liu ba ita-nia partidu hodi hamosu buat-ne’ebé mak ita lakohi mosu”, dehan deputadu ne’e.
Dadaun ne’e Sekretária Meza PN hosi CNRT Maria Terezinha Viegas no Vise Sekretáriu Meza PN hosi UDT/FM, Isabel Maria Freitas Ximenes. Uar
