Naunil Media (Dili), Deputada Bankada Parlamentár FRETILIN, Cidália Mesquita Ximenes preokupa hahalok funsiónariu Eletrisidade Timor-Leste (EDTL) iha Postu Administrativu Iliomar, Munisípiu Lautém, tanba to’o agora ahi eletresidade mate kuaze semana rua ona, kauza hosi udan bo’ot foin lalais halo ai-rin eletrisidade balu monu no tohar, maibe seidauk hadi’ak fila-fali.

Deputada hosi Bankada FRETILIN, Cidália Mesquita Ximenes, hato’o asuntu ne’e liuhosi nia intervensaun  plenária, iha Parlamentu Nasionál (PN), Segunda (25/05).

“Ohin dader alin balun mai hosi Ilimoar, ha’u husu katak eletrisidade seidauk lakan. Ita-nia komunidade sira iha ne’eba hakarak atu servisu hamutuk ho funsionáriu sira EDTL ne’ebé koloka iha Iliomar atu hadi’ak fila-fali ai-rin eletrisidade sira ne’ebé kleuk ona, maibé ho razaun saida mak to’o agora sira (funsiunáriu EDTL) seidauk hatan”, haktuir Deputada Bankada FRETILIN, Cidália Mesquita Ximenes.

Reprezentante Povu iha Uma Fukun Parlamentu Nasionál, Cidália Mesquita, husu ba governu atu tau atensaun lalais.

“Iha Iliomar eletrisidade la lakan semana rua resin, povulasaun sira mak loke kioske, sira iha sasan jeleira iha uma laran estragus hotu, no ba komunidade sira atu halo kontaktu ba malu ho telemovel, tamba ahi mate”, tenik Deputada Cidália Mesquita Ximenes.  

Deputada ne’e mos relata, katak “Rin eletrisidade kuaze 12  mak  hetan estragus, hafoin semana hirak liu-ba akontese udan no anin bo’ot  iha Iliomar”.

Hatan ba preokupasaun ne’e, Sekretáriu Estadu Komunikasaun Sosiál(SEKOMS), Merício Juvinal dos Reis ‘Akara’, núdar porta voz  governu konstitusionál da-ualu, hateten simu ona informasaun dadaun ne’e ekipa tékniku EDTL halo ona mauntensaun, maibé seidauk remata.

“Kona-ba eletrisidade mate iha postu Iliomar, hau mós foin simu informasaun hosi Ministériu Obras Públikas (MOP), katak EDTL halo hela intervensaun, espera tempu badak bele rezolve inklui estrada”. dehan Merício. Uar