Maria Angelina : “TL Tenke La’o Ba Oin no Labele Dependénsia Ba Ema Ida”
Naunil Media (Díli), Primeira Vise Prezidente Parlamentu Nasionál (VPPN), Maria Angelina Lopes Sarmento, hateten estadu Timor-Leste (TL) tenke la’o ba oin no labele dependénsia ba ema ida nia liman.
“Hau hanoin estadu tenke la’o ba oin, Timor-Leste labele dependensia ba ema ida nia liman. Kuandu iha ona intendimentu iha parlamentu nasionál sira konsege viabilija maioria ida, entaun maioria ne’e mak sai matadalan ida atu viabilija iha governu ida ne’e”, hateten Primeira VPPN, Maria Angelina Lopes Sarmento, ba jornalista sira hafoin enkontru líder bankada iha sala konferensia PN, Sesta (29/05)
Tuir deputa ne’e, Maria Angelina Lopes Sarmento, katak demokrásia hanorin iha maioria no minioria, tamba ne’e iha semana kotuk liu-ba hatudu ona maioria ida parlamentu nasional no tenke viabilija governu konstitusionál da-ualu to’o mandatu remata.
“Semana kotuk liu-ba hatudu ona maioria ida iha parlamentu nasional, tamba demokrásia tenke maioria no iha minoria. Maioria hatudu ona tenke viabilija governu ne’e to’o nia mandatu hotu”, tenik primeira VPPN, deputada Maria Angelina Lopes Sarmento.
Deputada Maria Angelina Lopes Sarmento, hatutan sidadaun hotu labele sobu estadu Timor-Leste tuir nia hakarak deit hodi ejiji Eleisaun Antisipada (EA).
“Ita labele sobu estadu ida ne’e tuir ita nia hakarak, ita ejije eleisaun antisipada. Ita ba eleisaun antisipada povu fó ona fiar mai ita liuhosi hala’o sira nia dever liuhosi ejerse nia direitu votu ba ita, agora kabee ba ita jere votu ne’ebe mak sira iha. Agora ita ejije tan ba eleisaun antesipada, ita atu koalia saida tan ba povu”, realsa reprezentante povu iha Uma Fukun PN, deputada Maria Angelina Lopes Sarmento.
Deputada Maria Angelina Lopes Sarmento dehan, povu Timor-Leste presiza dezenvolventu, sirkulasaun ekonomia iha rai-laran ho diak to’o iha area rural sira.
“Fiar katak plata forma entendementu entre partidu Fretilin, Khunto no PLP sei iha hanoin hanesan, tamba esperensia iha ona ba Aliansa Mudansa Progresu (AMP), halo governu sai failla iha dalan klaran”. Dehan deputada ne’e. Uar
