Aldeia Haat Iha Suku Gugleur Seidauk Asesu Estrada no Eletrisidade

Fahe Tutan

Naunil Media (Díli), Xefe Suku Gugleur, Guido Ramos Ribeiro, hateten suku ne’ebé nia lidera, iha aldeia haat (4) mak to’o agora seidauk asesu ba estrada no eletrisidade.

“Iha suku Gugleur ne’ebé mak durante ha’u lidera to’o ohin loron aldeia haat mak seidauk asesu ba estrada. Iha ne’e komunidade sira susar atu produtu ba fa’an iha merkadu tanba laiha Estrada di’ak” informa Xefe Suku Gugleur, Guido Ramos Ribeiro, ba jornalista Naunil Media iha nian kna’ar fatin, Sesta (11/06).  

Autoridade suku ne’e tenik liu-tan, “Ami nia preokupasaun seluk fali mak kona-ba eletrisidade, tanba dezede inisiu Timor-Leste hamriik núdar nasaun independente, iha ne’e (aldeia haat iha suku Gugleur) seidauk asesu eletrisidade”.  

Ho preokupasaun ne’e, Guido husu ba governu atu fó atensaun.

“Esperansa ba oitavu Governu konstituisionál lidera hosi Primeiru Ministru (PM) Taur Matan Ruak, bele realiza povu nia halerik tanba uluk nia sei Prezidente nia vizita hodi ho matan rasik”, espera Nia.   

Aldeia ne’ebé mak seidauk asesu ba estrada no eletridmsidade mak aldeia Palistla, aldeia Raenaba, aldeia Lauvou, aldeia Erito.

Suku Gugleur lokaliza iha Postu administrativu Maubara, Munisipiu Liquiçá ho nia aldeia 11 no total poulasaun 4474, Mane 2234, Feto 2240 ho uma-kain 1111. Lop

Leave a Reply

Your email address will not be published.