TLPU Deskorda Esbosu Lei Kriminaliza Difamasaun
Naunil Media (Díli) Prezidente Timor-Leste Press Union (TLPU), Manuel Pinto, hateten lakonkorda atu establese esbosu lei ba kriminaliza difamasaun tanba Timor-Leste núdar país ne’ebe tane aas direitu no demokrasia la fó dalan tuir konstituisaun Republika Demokratika Timor-Leste (K-RDTL).
“Iha estadu demokrátiku laiha fatin atu kriminaliza defamasaun, se hakarak mantein defamasaun kontinua mantein hanesan kasu sivil”, Prezidente TLPU Manuel Pinto hato’o kesataun ne’e ba jornalista sira liuhosi konferesia imprensa iha salaun Konsellu Imprensa (CI-Sigla Português), Kintal Boot, Tersa (12/06).
Prezidente TLPU, Manuel Pinto, hatutan “Ami mos husu Ministériu Justisa atu halo análiza liu-tan ba lei ne’e molok halo aprovasaun”.
Prezidente TLPU ne’e mos husu ba orgaun soberanu atu halo rezeisaun ba esbosu lei refere ne’ebé mak dadaun ne’e konsellu ministru diskute.
Iha fatin hanesan Diretor advokasia TLPU, Francisco Belo Simões, hatutan kona-ba esbosu lei kriminaliza difamasaun ne’e mak akontese, iha Timor-Leste sei implika ba iha liberdade imprensa iha mundial liu-liu iha Sudeste Asiatiku.
“Se lei ida Kriminaliza Difamasaun ne’e aplika duni, sei implika rankin sira ne’ebé durante ne’e ita hetan iha mundu liu-liu iha Asia ita hetan primeiru lugar” hatutan Prezidente advokasia ne’e.
Kona-ba atu kria esbosu lei ba kriminaliza difamasaun iha Kuarta feira 10/06/2020, Ministru Justisa, Manuel Carseres deklara sei kria lei refere hodi krimnaliza ema hirak ne’ebé mak halo difamasau, ho deklarasaun ne’e maioria entidade no líder akadémista inklui NGO balun mak lakonkorda, tanba lei refere sei viola konstitusaun RDTL Artigu 1 nomos Artigo 40 to’o 42 ne’ebé mak koalia kona-ba liberdade ema hotu-hotu nian iha nasaun Demokrátiku ida. Dms
