Komunidade Aldeia Palistla Iha Liquicá Inisiativa Rasik Loke Estrada Foun
Naunil Media (Díli), Komunidade Aldeia Palistla, Suku Gusgleur, Postu Administrativu Maubara, Munisípiu Liquicá iha inisiativa rasik hodi loke (ke’e) estrada foun atu fasilita sira (komunidade) lori produtu ba fa’an iha merkadu, bele asesu ba albulansia wainhira situasaun emerjénsia no nesesidade seluk tan.
Inisiativa loke Estrada foun ne’e, komunidade kompostu hosi joven feto-mane ho inan-aman sira hamutuk ho autoridade aldeia nian, sira ke’e Estrada ho deit ai-suak, enxada no material seluk ne’ebe tenke uza fiziku mak barak liu.
Komunidade sira ke’e Estrada foun ne’e kilometru tolu (3) liga entre aldeia Palistla ba suku Gugleur.
“Durante ne’e ema ruma moras ka inan ho kondisaun grávida sempre leba de’it, tanba dalan laiha atu fasilita ambulansia. Esperensia hatudu, durante ne’e iha inan isin rua ka grávida no ema moras grave sira mate iha dalan mak barak liu tanba laiha dalan asesu ba transporte (ambulansia), no espera katak ho dalan foun ne’e bele fasilita ona komunidade sira”, Reprezentante joventude aldeia Palistla Cornelio Lopes, ba jornalista Naunil Media iha fatin ke’e Estrada, Kinta (18/06).
Cornelio Lopes husu ba Governu atu lori dezenvolvimentu ba to’o iha aldeia ne’e konsidera rural liu no labele konsentra deit iha nasionál no vila munisípiu sira.
Iha fatin hanesan, Komunidade Atanasio de Carvalho, akresenta inisiativa refere laiha orientasaun no apoiu ruma hosi parte kompetente.
“Inisiativa kee estrada ida ne’e la hetan autorizasaun hosi parte governu tanba durante ne’e kompaña barak mak mai sukat ona maibé la realizasaun, entaun ami ho joven sira no inan-aman hola inisiativa ida ne’e hodi ke’e Estrada”, akresenta Nia.
Tuir Atanasio, estrada importante liu ba sira tanba ambulansia bele asesu ona wainhira iha situasaun emejénsia..
Jornalista Nauníl Media iha terenu Nota katak, komunidade sira ke’e ona dalan foun ne’e durante loron sanulu resin nen ona (16), kada semana sira ke’e loron tolu, iha Tersa, Kinta no Sábadu.
Aldeia Palistla lokaliza iha suku Gugleur, Postu Administrativu Maubara, Munispíu Liquicá ho total Populasaun 358, kompostu hosi mane 175, feto 180, ho uma kain 80. Lop
