Governu Australia Sei Apoia TL Dezenvolve Ekonómia
Naunil Media (Díli), Embaixadór Australia iha Timor-Leste, Peter Roberts, hateten Governu Austrália sei apoia nafatin Timor-Leste (TL) hodi halo rekuperasaun ekonómia iha rai-laran, liu-liu kauza husi Surtu COVID-19.
“Governu Austrália nafatin apoiu Timor-Leste hodi kombate COVID-19 no mos apiou area dezenvovimentu rekuperasaun ekonómia. Krize COVID-19 laos impaktu de’it ba saúde maibé krize impaktu sosiál tanba ne’e mak Governu Australia servisu hamutuk hodi rekopera fila fali ekonomia”, hateten Peter Roberts ba jornalista sira hafóin sorumutuk ho Primeiru Ministru (PM), Taur Matan Ruak, iha Palasiu Governu, Tersa (23/06).
Diplomata Australia ne’e, hatutan iha fulan ida ne’e Governu Austrália suporta ona kona-ba programa nasionál dezenvolvimentu suku liuhosi fundu Australia ni’an.
“Programa ne’e importante hodi suporta komunidade sira iha nível suku ni’an hodi hala’o servisu atu nune’e sira bele hetan osan hodi sustenta sira nia moris”, tenik embaixadór Australia mai Timor-Leste ne’e.
Reprezentante governu Australia iha Timor-Leste, esplika importansia hosi programa ne’e foka-liu ba agrikultura no estrada rural, nune’e hodi kontra hosi impaktu Corona Virus.
“Governu Australia sei kontinua fó apoia traballador Timor oan 1000 resin ne’ebé mak durante ne’e servisu iha ne’eba. Sira mos hala’o tratamentu tuir sistema saúde Austrália ni’an no buka-tan servisu fóun ba traballador sira”. Dehan Nia. Lop
