UE Prevé U$3 Millões Ba Ba Rekuperasaun Ekonómia iha TL
Naunil Media (Díli), Embaixadór União Europeia iha Timor-Leste (TL), Andrew Jacobs, informa relasiona ho impaktu Corona Virus Desease 2019 (COVID-19), dadaun ne’e União Europeia (UE) prevé hela U$3 millões hodi apoiu governu Timor-Leste ba rekuperasaun ekonómia.
“Dadaun ne’e ami iha tan osan ho montante U$3 millões, ne’ebe ami prevé hela inklui apoiu orsamentu direita ba governu, liu-liu União Europeia hakarak apoiu Timor-Leste iha kontekstu COVID-19”, diplomata UE mai Timor-Leste, Andrew Jacobs, ba jornalista sira hafoin sorumutuk ho Prezidente Repúblika, Francisco Guterres ‘Lú Olo’, iha Palásiu Prezidensiál, Bairu Pité, Tersa (23/06).
Embaixadór Andrew Jacobs, hateten tenke fortifika parseria entre União Europeia ho Timor-Leste.
“Importante tebes União Europeia ho Timor-Leste fortifika liu-tan parseira hodi foku dezenvolvimentu iha Timor-Leste tuir area ne’ebe lahanesan”, tenik embaixadór ne’e.
Durante sorumutuk entre diplomata União Europeia ho Xefe Estadu Timor-Leste, Lú Olo, sira koalia mos kona-ba papel Organização para Alimentação e Agricultura (FAO-Sigla Português) hodi foku-liu ba dezemvolvimentu ekonomiku inkluzivu hodi bele reforsa diak liu-tan sustentabilidade ekonomia Timor-Leste nian ba futuru. Dms
