Agustinho Sequeira ‘Somotxo’ : La Fasil Hatun PR Lú Olo
Naunil Media (Díli), Deputadu Bankada Fretilin no Aktual Prezidente Komissaun B trata asuntu Defeza, Seguransa no Negosiu Estranjeiru iha Parlamentu Nasionál (PN), Agostinho Sequeira Somotxo, hateten atu hatun Prezidente Repúblika (PR), Francisco Guterres ‘Lú Olo’ ne’e la fasil hanesan Ángela Freitas ninia hanoin.
Deputadu Agostinho Sequeira Somotxo hateten asuntu hodi responde ba keklarasaun husi Porta voz Rejistensia Nasionál Defende Justisa e Konstituisaun RDTL, Ángela Freitas iha loron 27/06/2020, ejije Xefe Estadu Timor-Leste Lú Olo atu rejigna-án, selae mak Ángela sei mobiliza massa hodi hatun komandante supremu ne’e, tanba foti desizasaun la a-favór ba povu Timor-Leste.
“Ema hotu iha direitu maibe to’o atu hatun Prezidente Repúblika, hau hanoin ida ne’e la’òs fasil, halo protestu, hanesan manifestasaun maibe dalan ba hatun Xefe Estadu Timor-Leste ne’e so liu husi eleisaun, tamba Prezidente Repúblika mos komandante em xefe, nia mak kaer forsa no defeza seguransa tomak”, deputadu Agostinho Sequeira Somotxo, ba Naunil Media iha PN hafoin Plenária, Segunda (29/06).
Deputadu Agostinho Sequeira Somotxo, hateten durante mandatu xefe estadu Lú Olo nian, seidauk iha desizaun ruma mak haliis ba partidu FRETILIN.
“Durante ne’e hau la haree tamba Prezidente Repúblika nu’udar Prezidente partidu karik nia lori estatutu partidu nian hodi hanehan povu tomak, maibe Prezidente Repúblika nu’udar xefe estadu buat hotu ne’ebe koalia no halo ne’e tuir konstituisaun. Hau la haree Prezidente Republika utiliza nia poder uza estatutu partidu nia hodi hanehan partidu politiku sira ka ema seluk iha rai ne’e”. dehan Somotxo. Uar
