SAMES Sei Estabelese Mini Laboratóriu Kontrolu Aimoruk

Fahe Tutan

Naunil Media (Díli), Diretór Ezekutivu Servisu Autónomu Medikamentus Ekipamentus Saúde (SAMES), Santana Martins, informa iha tempu badak sei estabelese Mini Laboratóriu hodi halo kontrolu ba aimoruk.

“Haree ba kualidade servisu nomoos kualidade produtu médiku sira nian, ita iha tempu badak sei estabelese servisu kontrolu aimoruk ba armazen SAMES nian”, Diretór Ezekutivu SAMES, Santana Martins, ba jornalista sira hafoin asina akordu kooperasaun ho Programa Dezenvolvimentu Nasoens Unidas (UNDP-Sigla Ingles) iha Kampu Alor, Segunda (29/06).

Diretór Ezekutivu SAMES, Santana Martins, esplika planu estabelesementu Mini Laboratóriu ne’e konta mos apoiu husi ajénsia sira Nasoens Unidas nian iha Timor-Leste.

“Konta mos ho apoiu husi UNDP, WHO, UNICEF, WFP no parseiru sira ne’ebé mai husi Australia, sira sempre disponivel apoiu wainhira SAMES hakarak halo aktividade, liu-liu infraestrutura”, tenik Diretór Ezekutivu SAMES ne’e.   

Iha fatin hanesan Reprezentante UNDP iha Timor-Leste, Munktaya Altangerel, promete sei apoia SAMES iha area ne’ebe lahanesan tuir nesesidade no kondisaun.

“Sei iha tempu naruk nia laran, ami hakarak apoia iha longu praju no ami mos kontinua apoia SAMES liu-liu haforsa-tan area hasa’e kapasidade”. realsa Nia.   Ina/Dul

Leave a Reply

Your email address will not be published.