Assanami Husu Progresu Polítika Desentralizasaun

Fahe Tutan

Naunil Media (Díli), Bankada Partidu Demokrátiku (PD) husu ba Governu kona-ba progresu polítika desentralizasaun ne’ebé prevé iha Planu Estratéjiku Dezenvolvimentu Nasionál (PEDN), tanba laiha ona kontinuasaun.

“Orsamentu mai ne’e ita tenke haree ona dezenvolvimentu suku, tenke dezenvolve di’ak ona iha kraik. Husu mos polítika desentralizasaun ne’e to’o iha ne’ebé ?, ita tenke haree ida ne’e”, Deputadu bankada PD, Mariano Assanami Sabino liu husi nia intervensaun polítika iha plenária, Parlamentu Nasionál, Segunda (06/07).

Bankada Congresso Nacional Reconstrução de Timor (CNRT), Deputadu Arão Noé de Jesus da Costa Amaral, reforsa presiza baze legál hodi regulariza polítika desentralizasaun.

“Ita seidauk aprova projetu lei podér lokál, ha’u hanoin polítika ne’e mos sei la la’o ho di’ak. Sé ita halo de’it ho dekretu Governu la la’o, tanba mandatu konstitusionál tenke regulariza lei no mos lei ba eleisaun municipal nian, projetu lei ne’e iha ona Komisaun A nia meza”, tenik Eis Prezidente Parlamentu Nasionál, Arão Noe.  

Ikus-liu, Deputadu Arão Noe, dehan “Hau hein katak komisaun A bele konsidera prosesu ba projetu lei ida-ne’e para ita aselera nune’e ita bele iha baze legál fó kompeténsia ba munisípiu sira reguladu tuir lei”. Uar

Leave a Reply

Your email address will not be published.