CNRT Dezafia Alkatiri Lori Kompania Oceanic Exploration ba Tribunal
Naunil Media (Díli), Deputadu Bankada Congreco Nacional Reconstrução de Timor (CNRT), Patrocino Fernandes, hateten CNRT dezafia Eis Primeiru-Ministru no aktual Sekretáriu Jerál Partidu FRETILIN, Marí Bin Amudi Alkatiri atu lori kompania Oceanic Exploration ba Tribunal nune’e públiku labele hela ho dúvida.
“Ami deputadu sira CNRT tomak hakarak dezafia Eis Primeiru-Ministru Marí Alkatiri atu lori Oceanic Exploration ba iha Tribunal, atu nune’e labele husik ‘dúvida’ ba iha povu tomak kona-ba subornu ne’ebé nia simu hosi ConocoPhillips. Sé karik Sekretáriu-Jeral Partidu Fretilin Marí Alkatiri lori duni ba Tribunal, ne’e tanba nia obrigasaun iha momentu ne’ebá nu’udar xefe do Governu atu rekopera hikas naran di’ak no asegura integridade Estadu Timor-Leste nian” deputadu bankada CNRT, Patriocino Fernandes, liu husi deklarasun polítika iha plenária Paralamentu Nasionál, Segunda (06/07).
Nia hatutan, hanesan polítiku, preokupa ho kompania internasionál akuza fali xefe Governu, ne’e presija hato’o keixa ba Tribunal, tanba ne’e akuza nasaun Timor-Leste.
“Akuzasaun ne’e ba Marí Alkatiri nu’udar xefe Governu reprezenta Estadu hodi halo kontratu no akordu sira, tanba dokumentu sira ne’ebé espalha iha públiku aprezenta dadus kompletu sobre subornu, inklui númeru montante osan ne’ebé mak haruka ba númeru konta bankaria Marí Alkatiri ho nia alin Ahmad Alkatiri nian. Hanesan polítiku no preokupasaun ami nian mak ita labele husik kompañia internasionál sira halo akuzasaun ba xefe Governu Marí Alkatiri”, dehan Patrocino.
Akuzasaun ne’ebe hanesan, antes ne’e liuhusi konferensia imprensa iha sede Partidu Trabalhista Akait, Porta voz Rejistensia Nasionál Defende Justisa no Konstituisaun Repúblika Demokrátika Timor-Leste (RNDJ-K-RDTL), Ángela Freitas mos husu Eis-Primeiru Ministru (PM) no Sekretáriu Jerál Paratidu Frente Revolusionáriu Timor-Leste Independete (FRETILIN), Marí Bin Amudi Alkatiri atu esplika ba públiku kona-ba simu subornu $2.5 miliaun husi ConocoPhilips.
“Ba kazu subornu ne’ebe ita hotu hatene, ita nia eis Primeiru Ministru Marí Alkatiri tenke toma responsabilidade atu bele esplika ba povu kona-ba simu subornu husi ConocoPhilips ne’ebe ita hotu hatene dadaun ne’e espalla iha media no públiku”. dehan Porta voz RNDJ-CRDTL, Ángela Freitas. Uar
