Marí Alkatiri Keixa Ona CPN-CNTR ba MP
Naunil Media (Díli), Tersa (07/07) ne’e, líder nasionál atual Sekretáriu Jerál FRETILIN, Marí Bin Amudi Alkatiri submete ona keixa ba Ministeriu Públiku (MP) kontra Komisaun Polítika Nasionál partidu Kongresu Nasionál Rekonstrusaun Timor (CPN-CNRT- Sigla Português) tanba halo akuzasaun falsu hasoru nia (Marí Alkatiri).
Antes ne’e liu husi konferensia imprensa iha sede partidu, CPN-CNRT akuza katak fundadór Estadu Repúblika Demokrátika Timor-Leste (RDTL), Marí Alkatiri simu subornu U$2.5 millaun husi kompañia ConocoPhillips.
Sekretáriu Jerál FRETILIN, Marí Bin Amudi Alkatiri, hateten nia ba hanesan sidadaun babain hodi hato’o keixa ba Ministériu Públiku.
“Hau mai hanesan sidadaun baibain hodi reklama ba estadu, hau-nia direitu no diginidade, labele atake hau, bainhira laiha baze. Hau luta ba timór no luta ba povu durante tinan 50 ona, maluk timor-oan balun keta inveza tenta diskrima oi-oin, agora hau haree buat sira ne’e (akuzasaun) sai boot ba beibeik, tempu ona hatudu ba maluk sira katak labele abuza demais, hau-nia toleransia ne’e de’it”, hateten fundadór RDTL, Marí Alkatiri.
Tuir Eis-Primeiru Ministru, Marí, lei sei iha, estadu tenke funsiona no justisa mos tenke funsiona, sira (CPN-CNRT) tenke mai prova iha Prokuradór Jeral Repúblika.
“Sé laiha fundamentu sira tenke resposabiliza la’ós akuza beibeik iha media oi-oin”, tenik Marí.
Ikus-liu, Eis Prezidente Autoridade RAEOA-ZEESM, Alkatiri, dehan keixa ne’e primeira faze ba membru CPN-CNRT, segundu faze sei kexia bankada CNRT iha parlamentu nasionál (PN), terseiru faze sei keixa sidadaun nain haat (latemi naran) nomós media balun. Entretantu aprezenta keixa ba MP akompaña husi Ahmad Alkatiri no advogadu nain rua hanesan José Guteres no Arlindo Sanches. Pau/Rit
