KHUNTO Keixa Ona Deputada CNRT Nain Rua ba MP
Naunil Media (Dili), Kuarta (08/07) ne’e, xefe bankada Kmanek Haburas Unidade Nasional Timor Oan (KHUNTO), Olinda Guterres hato’o ona keixa ba Ministériu Públiku (MP) kontra deputada nain rua husi bankda Kongresu Nasionál Rekonstrusaun Timor (CNRT-Sigla Português), deputada Maria Fernanda Lay no Virgina Ana Belo.
“Ida ameasa atu tuku mate deit hau no kontinuasaun iha Kuarta-feira maka ida hakat mai liu-kedas iha hau nia fatin, ida ne’e mak hau haree krimi bo’ot ida. Hau ho idade avansadu, sira ho fiziku mai ataka hau, ne’e mak hau keixa sira ba ministériu públiku”, Xefe bankada KHUNTO, Olinda Guterres, ba jornalista sira iha Paralamentu Nasionál, Kuarta (08/07).
Deputada ne’e hatutan, keixa ne’ebé nia submete ba Ministériu Públiku ne’e nu’udar xefe bankada KHUNTO nian.
“Hau hato’o keixa ba Ministériu Públiku nu’udar xefe bankada KHUNTO mak hatama keixa. Hau nu’udar deputada hala’o hela hau nia kna’ar”, esplika deputada ne’e.
Entertantu deputada bankda CNRT, Virgina Ana Belo, hateten nia ho deputada Fernanda Lay prontu atu hatan bainhira simu ona notifikasaun husi Ministériu Públiku.
“Sim, hau hanoin kuandu iha Segunda ka Tersa feira deputada Olinda dehan hakarak atu prosesa ba Ministériu Públiku, hau iha ne’eba deklara kedas dehan katak Seisa Feta A Vossa Vontade, ne’ebé hau preparadu kualker momentu no kualker tempu bainhira maka Ministériu Públiku hakarak notifika. Hau hanoin katak ami nain rua deputada Fernanda Lay koalia tiha ona iha bankada, ami prontu iha kualker hora no kualker momentu”. dehan deputada Virgina. Uar
