MP Baucau Entrega Sidadaun Estranjeiru 13 ba DJSM

Fahe Tutan

Naunil Media (Díli), Tersa (14/07) ne’e, Ministériu Públiku (MP) munisípiu Baucau entrega sidadaun Vietnam no Indonézia nain-13 kompostu husi mane nain-10 no feto nain-3 ba Diresaun Jerál Servisu Migrasaun (DJSM) hodi kontinua investiga molok deport aba sira nian nasaun.

Sidadaun husi nasaun Vietname no Indonézia nain-13 ne’e, sira tama mai Timor-Leste ho klandestinamente iha illa Jaco parte Ponta Leste iha loron 12 fulan Juñu 2020.

Diretór Jerál Servisu Migrasaun, Superintedente Asistente Agustinho Gomes, hatete hafoin hetán despaixu husi Ministeiru Públiku distritál Baucau, diresaun jerál servisu migrasaun mak  sei kontrola no  halo investigasaun tuir lei imigrasaun nian.

“Planu mak ne’e, hafoin diresaun jerál migrasaun  halo tiha hotu investigasaun, sei kordena ho embaixada Indonézia iha Díli para atu bele halo repartria ba sira nia nian rai”, Diretór Jerál Servisu Migrasaun, Superintedente Asistente Agustinho Gomes, ba jornalista sira, hafoin enkontru ho adidu polícia indonézia no  organizasaun internasionál Migrasaun,  iha fatin Kuarentena Raikotu, Tersa (14/07).

Diretór Jerál Servisu Migrasaun, Superintedente Asistente Agustinho Gomes, hateten prosesu deporta fila sidadaun Indonézia nain-2 ne’e sei liu husi sira nia embaixada, enkuantu sidadaun Vietnam nain-11 sei deporta liu husi International Organization Migration.           

“Sidadaun Indonézia ne’e  laiha problema, sira-nia koronel iha ne’e hela, ne’ebé embaixada Indonézia mak sei lori sidadaun Indonézia nain rua (2) fila, maibé agora dadaun ne’e ita fokus ba sidadaun 11 husi nasaun Vietname. Ami kordena hamutuk ho International Organization Migration buka maneira  no dalan ne’ebe mak diak  atu lori sira fila ba sira nia nasaun”, esplika Nia.

Entretantu Ministéiru Negosiu Estranjeiru no Kooperasaun (MNEK)  sei  kontaktu ba embaixada Vietname ne’ebé mak iha Jakarta. Nune’e  tuir lei migrasaun estadu Timor-Leste mak sei responsabiliza orsamentu ba sidadaun Vietname no Indonézia  fila ba sira nian nasaun. Flo/Pau.

Leave a Reply

Your email address will not be published.