FEATUREDGeralIkus LiuJustisaNews

Manifestante Sira Konsidera Ministru Cárceres ‘Beik’

Fahe Tutan

Naunil Media(Dili), Porta-voz Front Universitáriu Timor-Leste (FUTL), Novelino dos Santos, konsidera polítika husi Ministru Justisa Manuel Cárceres kona-ba ezbosu lei kriminaliza difamasaun hanesan desizaun ‘Beik’, tanba bele hamate valor demokrasia, liberdade imprensa no expresaun iha Timor-Leste.

“Ita la beik hanesan Ministru Justisa Manuel Cárceres. Ita nafatin respeita Manuel Cárceres, maibé ita nafatin kontra nia desizaun” Porta-voz FUTL, Novelino dos Santos, liu husi nia intervensaun iha resintu Liçeu Uiversidade Nasionál de Timor Lorosa’e (UNTL), Segunda (03/08).

Porta-voz FUTL, Novelino dos Santos, enkoraja manifestante sira atu halo asaun pasífika ho responsabilidade no uza kapasidade intelektual kontra Ministeriu Manuel Cárceres, tuir prinsípiu abaixu ezbosu Lei krimminaliza difamasaun.    

Manifestante Guerson Ribeiro, informa objetivu principal husi asaun refere atu prova no fó hanoin ba Ministru Justisa Manuel Cáceres, tetu hikas nia desizaun kona-ba ezbosu Lei Kriminaliza Difamasaun.

“Ministru Justisa tenke tetu didi’ak antes, karik uza brutalidade hodi kontinua lei ne’e, ami nafatin hamrik hodi hateten Lei Krimininaliza Difamasaun ne’e sala”, tenik manifestante Guerson.  

 Prezidente Asosiasaun Jornalista Timor-Lorosae (AJTL), Maria Zevonia Viera, hateten la konkorda totalmente Lei Krimininaliza Difamasaun, tanba defende liberdade imprensa no liberdade espresaun ne’ebé konjuga iha Konstituisaun Repúblika Demokratika Timor-Leste (K.RDTL)  artigu 40-41.

“AJTL rezeita total esbosu lei kriminaliza difamasaun, Ita nia  bo’ot  iha tempu luta sira uza  liberdade imprensa hodi kontra okupasaun Indonensia ohin loron ita ukun rasik-an. Maun Jose Ramós Horta, Xanana, sira nia kna’ar hanesan jornalista iha tempu ne’eba hodi informa ba mundu katak ita hakarak ukun rasik-án, tanba ne’e ita kontinua defende  liberdade imprensa no liberdade espresaun iha Timor-Leste”, afirma prezidente AJTL, Zevonia.  

Diretór FONGTIL, Daniel Santos do Carmo, hateten manifestasaun ne’e sei la para enkuantu Ministru Justisa Manuel Cárceres seidauk deklara atu hapara Ezbosu Lei Kriminaliza Difamasaun.

“Asaun ida ne’e sei kontinua to’o Ministru tun mai, hateten para ona Ezbosu Lei Kriminaliza Difamasaun”, hateten Diretór FONGTIL ne’e.

Manifestasaun ne’e organiza husi Front Universitáriu Timor-Leste (FUTL), no apoiu husi Asosiasaun Jornalista Timor-Leste (AJTL) no sosiedade sivil balu iha Timor-Leste ho objetivu atu trava polítika Ministru Justisa Manuel Cárceres, kona-ba Ezbosu Lei Kriminaliza Difamasaun. Rit/Ivo

Leave a Reply

Your email address will not be published. Required fields are marked *