PNTL Díli Garante Asaun Pasífiku Kontroladu
Naunil Media (Díli), Segundu Komandante Polísia Nasionál Timor-Leste (PNTL) Munisípiu Díli, Superintendente Asistente Euclides Belo, deklara PNTL Munisípiu Díli sei kontinua fó seguransa ba manifestasaun ne’ebe organiza husi Front Universitáriu Timor-Leste (FUTL) atu garante no asegura asaun pasifika refere la’o ho situasaun normal.
“Seguransa ne’ebé ami koloka ne’e bele garante ba asaun ne’ebé Front Universitáriu sira halo. PNTL kordena ho porta-voz Front Universitáriu, iha komunikasaun ativu, tuir akta ne’ebé asina husi Front Mahasiswa”, Segundu Komandante PNTL Munisípiu Díli, Superintendente Asistente Euclides Belo, ba jornalista sira iha nia kna’ar fatin, Kaikoli, Segunda (03/08).
Superintendente Asistente Euclides Belo, esplika PNTL blokeia dadaln iha resintu fakuldade ekonomi UNTL oin atu estudante sira bele halo asaun.
“Movimentu ne’ebé halo iha resintu fakuldade Ekonomi UNTL nia oin, ami blokeia, nune’e estudante sira bele halo asaun, maibé la taka dalan ba públiku, ne’e utiza metade hanesan haktuir Lei nú.1/2006 iha artigu 12”, tenik Superintendente Asistente Euclides Belo.
Segundu Komandante PNTL ne’e informa, Komandu PNTL Dili koloka unidade sira maka hanesan tranzitu, Forsa Rezerva, patrolla, Investigasau, inklui polisiamentu komunitaria atu halo komunikasaun ho front mahasiswa.
Manifestasaun ne’e organiza husi Front Universitáriu Timor-Leste (FUTL), no apoiu husi Asosiasaun Jornalista Timor-Leste (AJTL) no sosiedade sivil balu iha Timor-Leste ho objetivu atu trava polítika Ministru Justisa Manuel Cárceres, kona-ba Ezbosu Lei Kriminaliza Difamasaun. Jjf
