AIFAESA Reativa Hikas Padaria Rua iha Díli
Naunil Media (Díli), Kuarta (06/08) ne’e, Autoridade Inspesaun no Fiskalizasaun ba Atividade Ekonómia Sanitáriu no Alimentar (AIFAESA) reativa hikas padaria rua tanba kumpri ona rekezitu sira tuir dekretu Lei númeru 28/2011.
Diretór Departamentu Operasional AIFAESA, Gabriel da Costa, informa reativa hikas ona padaria rua iha Munisípiu Díli, hanesan Oriental Unipessoal, Lda Likintai no Paramita.
“AIFAESA louva ba kompainia sira, tanba iha koperasaun di’ak ho autoridade inspeksaun, semana ida sira hadiak nia fatin tuir lei ne’ebé vigor. Ida ne’e exemplu di’ak ba padaria hotu-hotu nomos industria sira hanesan tahu no tempe”, Diretór Departamentu Operasional AIFAESA, Gabriel da Costa, ba jornalista sira hafoin reativa Padaria Oriental Unipessoal, Lda, iha Lahane Oriental.
Diretór Departamentu Operasional AIFAESA ne’e, akresenta tuir lei loron 90 (fulan 3) nia laran maibé sira servisu maka’as iha semana ida bele hadiak ona sira nia fatin.
Enkuantu husi Kompaña Padaria Lahane Oriental Unipessoal, Lda, Roberto Nilton, lamenta ho AIFAESA nia servisu tanba wainhira parte kompania atu ba hasoru AIFAESA maibe la atende.
“Sira mai primeru fó karta mai ami dehan atu ba hasoru sira, maibé ami ba la iha ema ida maka atu atende ami, entaun ami fila-fali mai sira fó tempu mai ami atu hadia fatin maibé la to’o fulan sira fó karta dehan ami taka razaun saida, ami nia sala saida karik esplika mai ami”. Dehan Roberto Nilton. Ivo
