Reprezentante OMS iha TL Despede PR Lú Olo
Naunil Media (Díli), Kuarta (02/09) ne’e, Reprezentante Ogranizasaun Mundial Saúde (WHO-Sigla Ingles), Rajesh Pandav, hakaat ba Palásiu Prezidentensiál Nicolau Lobato hodi kumprimenta no despede Prezidente Repúblika (PR), Francisco Guterres ‘Lú Olo’.
Reprezentante WHO, Rajesh Pandav agradese apoiu tomak mak husi Xefe Estadu Timor-Leste Lú Olo no Timor oan hotu-hotu durante ninia períodu mandate kuaze tinan sanulu iha Timor-Leste (TL).
Reprezentante WHO ne’e, informa kooperasaun sira mak durante ne’e Organizasaun Mundiál Saúde halo ho Ministériu Saúde Timor-Leste nian iha área sáude públika mak hanesan kombate malária, sarampu, moras ain-potis no ikus-liu, prevensaun ba Surtu COVID-19.
Prezidente Repúblika, Francisco Guterres Lú Olo apresia no agradese servisu husi Organizasaun Mundial Saúde hodi apoia seitór saúde iha Timor-Leste, ho koordenasaun husi ninia reprezentante Rajesh Pandav durante tinan lima ikus.
Ho nia naran rasik no mós ho timoroan hotu-hotu nia naran, Prezidente Repúblika, hatete nia sente gratu ba tulun hotu-hotu ne’ebé OMS fó mai Timor-Leste, liuliu ho sira-nia esforsu hodi ajuda Estadu Timor-Leste halo prevensaun no kombate COVID-19.
Xefe Estadu afirma Timor-Leste kontinua presiza nafatin OMS hodi dezenvolve seitór saúde no halo prevensaun ba moras hotu, inklui COVID-19.
Prezidente Repúblika espera katak OMS ho apoiu komunidade internasionál, bele hetan lalais vasina hodi hakotu pandemia ida ne’e.
Rajesh Pandav hahú nia knaar hanesan reprezentante OMS iha Timor-Leste, iha abril 2015. Nia ligasaun ho OMS hahú iha 2004 hanesan profesionál iha Unidade Saúde Mental. Husi ne’ebá nia asumi knaar oin-oin iha OMS no servisu iha Maldivas husi 2007 to’o 2008, hanesan profisionál planeamentu no jestaun. Iha nasaun ne’e, nia hala’o mós knaar hanesan médiku saúde públika OMS nian husi 2009 to’o 2011.
Nia hahú servisu iha OMS Timor-Leste iha 2011, nu’udar Konselleiru ba Polítika Saúde to’o 2015, tinan ne’ebé nia hahú hala’o knaar nu’udar Reprezentante OMS iha Timor-Leste.
Rajesh Pandav sei husik Timor-Leste iha 16 setembru no sei hala’o knaar nu’ udar Reprezentante OMS iha Nepal. Pau/Emj9
