PR Lú Olo : Espíritu RENAN SELAC Sei La Lakon

Fahe Tutan

Naunil Media (Díli), Sesta (11/09) ne’e, Prezidente Repúblika (PR), Francisco Guterres ‘Lú Olo’, presta omenajen ba eis-gerileiru sekretáriu rejiaun Um Ponta Leste Faustino dos Santo alias RENAN SELAC (Render Nunca A Não Ser Leva A Cabeça) iha rezidensia saudozu nian fomentu Díli no fó votos de pezar ba família enlutada.

Xefe Estadu Timor-Leste, Francisco Guterres ‘Lú Olo’, hateten saudozu nia espíritu sei moris nafatin hamutuk ho ema hotu.

“Ha’u-nia kompaneiru no irmaun ida mak mate, ho Prezidénsia Repúblika no hanesan veteranu hato’o votus de pesar ba família sira hotu hodi hateten ba sira katak biar nia mate maibé nia espíritu sei la lakon no sei hela nafatin”, hateten PR Lú Olo.

Lú Olo hatutan, partisipasaun RENAN SELAC durante tinan-24 iha luta armada, hamutuk ho kompañeiru sira luta ho dignidade no korajen ba povu  no rai doben Timor-Leste.   

“Nia la’o ho ami ho dignidade boot tebetebes. Ho korajen boot tetetebes atu bele luta ba Povu ida ne’e, Rai ida ne’e ba ukun rasik-an. Renan Selac ho ami hakat liu maluk sira nia isin ne’ebé monu iha sorin-sorin, monu iha oin, iha kotuk. Nia hakat liu susar sira ne’e hotu hodi hametin liután nia determinasaun ho korajen boot tebetebes atu la’o to’o nia rohan, Timor ukun rasik-an” tenik Aman Nasaun Lú Olo.  

Nu’udar Prezidente Repúblika no veteranu sente laran taridu no susar ne’ebé família sira hotu hasoru iha situasaun difísil ida ne’e nia laran.

“Laran taridu no susar ne’beé familia sira hotu hetan. Sente iha momentu ida ne’e, ha’u hanesan Prezidente Repúblika no mos veteranu sente saida mak imi sente.Renan Selac laiha ona iha ita-nia leet, Renan Selac ho ami halo viajen ida ne’ebé naruk tebetebes, sakrifísiu no terus oioin hodi bele to’o ohin no husik hela ita hotu” PR Lú Olo sente triste.

Render Nunca A Não Ser Leva A Cabeça (RENAN SELAC) moris iha aldeia Ira Ara, suku Fuiloro, postu administrativu Lospalos, iha loron 1 maiu 1951, nu’udar veteranu ne’ebé luta durante 24 anos iha ai-laran.

Iha tinan 2007-2012, Renan Selac asume kargu nu’udar Vise-Prezidente partidu UNDERTIM no sai membru Parlamentu Nasionál iha segunda lejislatura.

Iha 2017, Konferénsia Conselho dos Combatentes da Libertação Nacional Munisípiu Lautem nian nomeia Renan Selac sai ninian Prezidente ba Munisípiu Lautem.

Iha janeiru 2020, Kongresu Nasional Conselho dos Combatentes da Libertação Nacional hili Renan Selac sai ninia Vise-Prezidente.

Iha tinan-2018, Prezidente Repúblika kondekora Renan Selac ho Kolár Ordem Timor-Leste.

Renan Selac hakotu iis iha 10 setembru 2020, iha Hospitál Nasionál Guido Valadares. Pau/Emj9

Leave a Reply

Your email address will not be published.