KHUNTO Prefere Xanana Troka Taur

Fahe Tutan

Naunil Media (Dili), Adjuntu Sekretariu Jeral Partidu Kamanek Haburas Unidade Nasional Timor Oan (KHUNTO), Luis Roberto, prefere liu figura lideransa Kay Rala Xanana Gusmao, iha koaligasaun foun entre CNRT, KHUNTO, PD, PUDD, UDT ho FM ne’e maka bele hakat ba asume pasta Primeiru Ministru hodi troka Taur Matan Ruak.

Kestaun hirak ne’e atual viseprezidenti Parlamantu Nasional darua husi Bankada KHUNTO, Luis Roberto hato’o ba jornalista hafoin lidera plenaria iha uma fukun PN, Segunda (24/02).

Bainhira hatan ba jornalista katak pozisaun KHUNTO ba koaligasaun foun kompostu husi CNRT, KHUNTO, PD, PUDD, UDT no FM, mantein fo fiar ba figura Kay Rala Xanana Gusmao atu lidera Nonu Governu oin mai.

“Khunto ninia hanoin no vizaun maka atu kria Nonu governu agora, governu foun mai ne’e ami hakarak maka mantein senior Kay Rala Xanana Gusmao nu’udar Xefe Governu ba tinan rua, tolu ida ne’e,”dehan Adjuntu Sekretariu jeral KHUNTO, Luis Roberto, iha uma fukun PN.

Tanba tuir Luis Roberto katak, koaligasaun foun ne’e atu bele garantiha estabilidade governasaun nonu governu nian maka partidu KHUNTO hola ona desizaun klaru katak Xanana maka bele garantiha estabilidade governasaun foun mai ne’e.

“ami deside klaru ona, ne’e ho fuan, ho laran, ho kolektivu teb-tebes iha ami nia CPN intermus partidu Khunto ninian, ami deside maka senior Xanana Gusmao tenke ba primeiru ministru,”Luis Roberto hatete.

Nia afirma, laiha figura ka ema lider sira seluk maka atu bele troka figura Xanana Gusmao, maibe seluk husi ida ne’e Khunto sei koalia nu’udar politiku.

Tanba koaligasuan foun husi partidu neen ne’ebe sabadu,22/02 asin paktu koaligasaun ne’e hodi koresponde opsaun ne’ebe Prezidenti Republika Francisco Guterres Lu olo ne’ebe fo sai ba partidu asentu parlamentar sira.

Entaun patidu CNRT, KHUNTO, PD, PUDD, UDT no FM konsege forma ona koaligasaun maioria parlamentar hodi responde ba impase politika ne’ebe la’o ona ita nia rai kleur.

Nia esplika, koaligasaun foun ne’e seida’uk fo sia nia plataforma governu foun ka nonu governu nian tanba seida’uk tu’ur hamutuk atu hadia estrutura foun governu nian.

“platafora estrutura governu seida’uk bele fo sai tanba seida’uk tu’ur hamutuk para atu hadia ita nia estrutura ne’e seida’uk, ne’ebe hau seidauk bele fo sai,”Luis esplika.

Maibe tuir nia katak, prosesu diskusaun kontinua la’o, pollitikamente sempre la’o nafatin, tanba kuandu iha koaligasaun foun entaun sempre hamoru estrutura foun.

Tanba ne’e maka partidu politiku sira involve iha koaligasaun ne’e sempre fo ninia lider-lider potensial sira ne’e, rekursu diak partidu nian rekolla para submete ba estrutura nonu governu nian antes lori ba Prezidenti Republika.

Antes ne’e, premeadu nobel da paz, Jose Ramos Horta hatete, koaligasaun foun ne’ebe CNRT lidera hanesan KHUNTO, PD, PUDD, UDT no FM ne’e diak liu figura esperensia Xanana Gusmao maka lidera atu nune’e bele garantiha estabilidade governativa too tinan tolu oin mai.

“sim senior Xanana, hau mos hatete nune’e, hatete ba nia maun boot ita mak tinan tolu ba ne’e tenke ka’er governu ne’e, ka’er metin,”eis Prezidenti Republika Ramos Horta hatete hafoin partisipa asinatur koaligasaun fon iha sede CNRT Bairo Grilus, sabadu,(22/02).

Ramos Horta sublina, Xanana nia autoridade, Xanana ninia esperensia, ne’e lider nasional hotu-hotu tane nia para servisu ne’e la’o diak liu, entaun nia iha formasaun nonu governu mai ne’e Ramos Horta prefere Xanana maka sai xefe governu para hodi halo servisu todan sira ne’e.

“hau prefere liu maun bo’ot Xanana Gusmao, nia maka tenke ba kaer duni todan ne’e,”tenik Ramos Horta.

Bainhira jornalista tenta konfirma deputadu sira husi bankada CNRT, inklui hein Xefe banakda rasik maibe ikus mai lakohi fo komentariu sobre politika ne’ebe la’o hela dadauk hodi buka solusaun ona ne’e. Ana

Leave a Reply

Your email address will not be published.