Deskonfia Arguidu LDM Sona Feen VSP Hatan iha TDD

Naunil Media (Díli), Deskonfia arguidu inisial LDM sosa nia feen inisial VSP tanba feen sai husi uma la fó hatene ba laen nune’e hatan iha   Tribunál Distrital Díli (TDD).

Iha akuzasaun ne’e,   arguidu  LDM  komete krime Omisidu agravadu  previstu iha artigu 139 kódigu penal no krime arma Branka husi artigu 20 lei nú.05/2017,  hasoru lejada  VSP hanesan feen,  lejada rasik halai sai husi uma la iha koñesimentu husi  laen.

Tuir prova sira husi Ministériu públiku (MP) akuza ba arguidu LDM lee sai husi juíza katak, arguidu ho lejada iha problema hanesan feen ho laen, maibé lejada halai sai husi sira nia uma iha Bairo-Pite, lejada husik hela nia oan ho arguidu ba hela ho nia (lejada VSP) apa sira uma iha kintal Ki’ik.

Iha loron 6 fulan Marsu tinan 2020, oras tuku 14h00, arguidu ho testemuña Nelio Sequeira de Jesus (Akilis) nia uma iha Matadoru, arguidu husu ajuda ba testemuña atu ko’alia ho lejada para fila-fali ba arguidu nia uma hodi haree sira nia oan.

Maibé, iha oras tuku 16h00, lejada telefone ba testemuña depois testamuña aproveita hodi dehan, orsida kalan ita tur hamutuk iha Rate seroja Makan Palawan Balide, lejada responde entaun los ona.

Nune’e iha oras tuku 19h00, arguidu mai iha testemuña (Akilis) nia uma iha Matadoru, maibé iha nia bolsu tau tudik, hafoin testemuña tula arguidu ho Motorizada sira ba iha Seroja Balide. Sira to’o iha ne’e bá oras tuku 20h00 lejada ho testemunã sira seluk tur uluk ne’ebá no hemu hela serveja superbock, arguidu tun husi motor ba hasoru uluk lejada no rein tiha nia rentos no husu deskulpa ba lejada.

Arguidu ho lejada tur ses tiha husi testemuña sira seluk, arguidu tenta konversa ho lejadaatu fila-fali ba moris hamutuk hodi haree sira nia oan. Maibé lejada hatan dehan labarik iha ó ne’e mate tiha mós di’ak no lakohi fila ba uma.

Entaun situasaun ne’e, halo arguidu nervozu bainhira lejada ho lanu ba hamrik mi iha sira nia oin estrada bo’ot, arguidu hase dehan o nusa? Lejada hatan o sibuk ha’u halo saida? No akompaña ho liafuan tolok ba arguidu, arguidu hamrik dudu ses tiha lejada no lejada atu tuku fali arguidu maka arguidu hasai tudik husi bolsu sona dala ida lejada nia hirus matan, sona tan dala ida iha kotuk laran, arguidu haree ran sai no hakuak tiha hafoin husik monu barai, arguidu tauk no halai ba sira nia uma.

Hafoin rona tiha provas husi MP,   arguidu LDM konfesa ba tribunál katak, faktus sira ne’e loos hotu.

 “Arepende ba hahalok bainhira iha prizaun, nia (VSP) sai husi uma semana ida labarik tanis ne’e, maka ha’u ba buka nia, ha’u lori tudik la iha intensaun atu estraga, maibé iha estrada nia ko’alia liafuan la di’ak ne’e, maka ha’u nervozu hodi sona”, deklara arguidu LDM iha sala julgamentu, TDD, Kuarta (16/09).

Iha fatin hanesan lejada haktuir, “Bainhira ha’u sai  uma semana ida, ba hamutuk ho ha’u-nia família sira, momentu kalan ha’u ho kolega sira telefone malu hodi hemu tua, maibé ha’u sai husi ne’e ba la ko’alia ba nia, entaun nia buka ha’u to’o bolu ha’u atu fila ba uma hodi haree labarik, maibé ha’u lakohi ne’e maka nia sona ha’u”.  afirma lejada (VSP).

Lejada VSP informa, kuandu nia iha prizaun inan-aman maka sustenta moris sente la seguru.

Rona tiha parte rua ne’e, tribunál sei hadia hikas fali julgamentu iha loron 28 fulan Setembru tinan 2020, oras 17h00 hodi rona alegasaun.

Iha Audénsia julgamentu ne’e, prezidi husi juis koletivu Maria Solana, Ivan Suritay, Ana Paula Fonseca no  Ministériu públika reprezenta husi prokurad’or Jerál Alfeu Moreira, arguidu hetan asistensia legal husi advogadu privadu Gil Amaral. Rit