AUTL Tama Prizaun, Akademista Konsidera Lei Vale ba Ema Ki’ik Deit
Naunil Media (Díli), Akademista Universidade Nasionál Timor Lorosa’e (UNTL), Julio Aparicio, konsidera lei eziste iha Timor-Leste (TL) rigór de’it ba ema ki’ik sira ne’ebe mak la iha podér.
Akademista UNTL, Julio Aparicio, koalia kestaun ne’e relasiona ho membru (estudante) Asosiasaun Universitáriu Timor-Leste mak daudaun ne’e kumpri prizaun preventiva, hafoin sira halo asaun hasoru Ministériu Ensinu Superior Siensia no Kultura foin lalais.
“Wainhira estudante sira halo protesta tanba buat ruma laloós, agora senhora Emilia Pires (Eis-Ministra Finansas) halai lakon tiha. Tanba sa mak lei ne’e regirozu liu ba ema ki’ik sira no estudante sira ne’ebe agora ema seluk ne’e livre hela ne’e tanbasa?”, Akademista UNTL, Julio Aparicio, ba jornalista Naunil Media, iha Kampus Lama, Kaikoli, Sesta (18/09).
Akademista UNTL, Julio Aparicio, akresenta nu’udar Docente UNTL defende estudante sira.
“Hau defende hau nia estudante sira, Governu dalaruma dehan hau maka la hatene hanorin estudante sira, maibe keta haluha sira mos la hatene hanorin. Hau hanoin lei tribunal labele ba ema ki’ik de’it maibe tenke ba ema hotu, balun diak tanba sira iha osan iha buat hotu sira livre”, tenik Akademista UNTL, ne’e.
Akademista UNTL ne’e dehan, durante nia observa iha deputadu balun nia oan sira soke ema , tribunal fó livre de’it atur dalan di’ak, tanba sa estudante sira ne’ebé ki’ak, duputadu ida nunka atu defende.
Nia husu ba ba estudante no joven sira tenke kuidadu aán, tamba Timor-Leste la’o hela iha injustisa bo’ot no la iha ema ida atu tau matan ba ema ki’ik sira. “Di’ak liu agora estuda sai matenek para aban-bainrua ukun fali rai ne’e ho diak”. dehan Nia. Ivo
