Lere : Polítika La Estavél Difikulta Programa Instituisaun F-FDTL

Fahe Tutan

Naunil Media (Díli), Xefe Estadu Maior Jeneral FALINTIL-FDTL, Majór Jenerál Lere Anan Timur, hateten ho situasaun polítika rai-laran ne’ebé la estavél no Timor-Leste la’o deit ho Dotasaun Orasamentu Temporaria (DOT) kria difikuldade ba instituisaun hotu, inklui FALINTIL-FDTL hodi hala’o nia programa.

Xefe Estadu Maior Jeneral FALINTIL-FDTL, Majór Jenerál Lere Anan Timur, ba jornalista sira hafoin sorumutuk seminal ho Prezidente Repúblika (PR), Francisco Guterres ‘Lú Olo’, iha Palásiu Prezidensiál Nicolau Lobato, Bairu Pité, Kuarta (14/10).

Eis-gerileiru rezistensia komandante rejiaun um ponta leste, Lere hein katak situasaun sira ne’e bele rezolve lalais hodi Governu konsentra no kria kondisaun moris di’ak ba povu, ba veteran sira no instituisaun estadu bele iha progresu.

“Sé de’it forma Governu laiha problema. Ha’u-nia kestaun mak ida ne’e, Governu ida tenki estavel. Ami laiha kompeténsia ba area ida ne’e, mas ami husu de’it estabilidade governamental atu rezolve problema ita-nia povu nian i rezolve problema instituisaun sira nian”, afirma Majór Jenerál Lere Anan Timur.

Veteranu 24 anos, Lere haktuir, kona-ba kestaun ne’e, xefe estadu Timo-Leste Lú Olo nu’udar Komandante Supremu-das-Forsas Armadas, mos preokupa, maibe nia (PR Lú Olo) mós labele deside.

“Nia (Xefe Estadu Timor-Leste Lú Olo) tenki hato’o ba orgaun kompetente é Governu, Primeiru Ministru atu bele haree ho Ministru Defeza atu bele haree problemas hirak ne’e”, tenik Jeneral Lere Anan Timur.  

Majór Jenerál Lere Anan Timur, dehan maske enfrenta difikuldade oi-oin maibé F-FDTL firme no kontinua kumpri misaun asegura Timor-Leste nia soberania.

Durante sorumutuk seminal ho Prezidente Repúblika, Francisco Guterres Lú Olo, Jenerál Lere informa situasaun Forsas Armadas no situasaun seguransa rai-laran. Pau/Emj9

Leave a Reply

Your email address will not be published.