FEATUREDIkus LiuNewsPolitika

PR Lú Olo Promulga Dekretu-Lei Apoiu Planu Rekuperasaun Ekonómika

Fahe Tutan

Naunil Media (Díli), Prezidente Repúblika, Francisco Guterres ‘Lú Olo’, iha 13 Outubru ne’e, promulga Dekretu-Lei kona-ba medidas apoiu hodi hala’o no mantein atividade ekonómika iha ámbitu planu rekuperasaun ekonómika.

Xefe Estadu Timor-Leste Lú Olo Promulga Dekretu-Lei kona-ba medidas apoiu hodi hala’o no mantein atividade ekonómika iha ámbitu planu rekuperasaun ekonómika, fó liu husi Komunikadu Imprensa, Palásiu Prezidensiál Nicolau Lobato, Díli, Kuarta (14/10 ).

Apoiu ne’e sei fó ba entidade empregadora sira ne’ebé mak la partense ba setór públiku, ba emprezáriu ne’ebé reprezenta nia-an rasik, traballadór ho konta rasik no ba traballadór doméstiku ne’ebé lakon sira-nia negósiu ka reseita.

Entidades hirak ne’e tenki rejista ona iha rejime kontributivu Seguransa Sosiál no rejista iha sistema fiskal, hanesan kondisaun atu simu apoiu ne’ebé Governu sei fó mak hanesan: dispensa parsiál ba kontribuisaun kada fulan ba seguransa sosiál no fó montante osan kada fulan hanesan subsídiu hodi apoiu hala’o no mantein sira-nia atividade ekonómika.

Apoiu ne’e sei fó mensalmente  ba entidade empregadora durante fulan haat hafoin diploma ne’e tama iha vigor.

Implementasaun ba medidas apoiu ida ne’e sei lidera husi husi Ministru Koordenadór ba Asuntu Ekonómikus ho involvimentu husi servisu públiku relevante.

Konsellu Ministru aprova Rezolusaun Governu númeru 28/2020, 19 agosto, kona-ba medidas kurtu prazu ba mitigasaun impaktu husi krize ekonómika, hodi nune’e kria apoiu nesesariu sira ba rekuperasaun ekonómiku, liuhusi estimula empregadór sira hodi hala’o nafatin sira-nia atividade, iha ámbitu Planu Rekuperasaun Ekonómiku.

Prezidénsia Repúblika simu diploma ne’e iha 6 outubru  2020, hafoin hetan aprovasaun husi Konsellu Ministru iha 16 setembru 2020. */Pau

Leave a Reply

Your email address will not be published. Required fields are marked *