Durante EE TDD Finaliza Kazu 494
Naunil Media (Díli), Prezidente Tribunal Rekursu (TR), Deolindo dos Santos, informa durante period Estadu Emerjénsia (EE) Tribunal Distritu Dili (TDD) desidi finaliza kazu ho karater urjénsia hamutuk 494.
“Iha Tribunal Distritu Dili hahu hosi Janeiru to’o Marsu, antes de estadu emerjénsia iha desizaun mak sai ne’e hamutuk 494, signifika maske iha estadu emerjénsia maibé tribunal nafatin hala’o servisu”, PTR, Deolindo dos Santos, ba jornalista sira hafoin enkontru mensal ho Prezidente Repúblika, Francisco Guterres ‘Lú Olo’ iha Palásiu Prezidensiál Nicolau Lobato, Bairu Pite, Tersa (30/06).
PTR, Deolindo dos Santos, informa kazu iha tribunal Baucau ho Suai, iha kazu ho karketer emerjénisa ho númeru ki’ik no kazu hirak ne’e iha hela prosesu normal.
“Kazu pendente iha tribunal so iha Díli mak ho numeru ne’ebé bo’ot hamutuk 2000, kazu sivíl ho total 1.023, Baucau kazu krime hamutuk 600 ital, kazu sivíl 200, total 800, Suai kazu krime 800 ital, kazu sivíl total 200, kazu pendenti 1000 ital, iha Rejaiun espesial Oe-cuse kazu sa’e maka’as maske uluk 300 ital maibé agora sa’e to’o 500 ital, hosi kazu hirak ne’e kazu krime 300, kazu sivil ne’ebé iha prosesu nia laran hamutuk 113”, relata PTR Deolindo.
Tuir dadus, kazu pendete ne’ebé mak iha durante ne’e TDD rejista hamutuk 212, hosi kazu hirak ne’e hahu hosi fulan Janeiru to’o ohin loron TDD deside hasai ona kazu hamutuk 171, dadaun ne’e tribunal prosesa hela kazu (9), hosi kazu refere kazu krime 6 kazu sivil 3, no dadaun ne’e tribunal la iha kazu akumuladu. Dms
