Vise-MS Maucoli Apela Ema Hotu Abitua Fase Lima ho Sabaun
Naunil Media (Díli), Vise-Ministru Saúde, Bonifacio Maucoli Dos Reis, apela ba ema hotu atu kontribui ba moris saudável liu-liu eduka família atu abitua fase liman ho sabaun iha moris lor-loron.
“Informasaun no mudansa hahalok mak bele lori ita ba moris saudável, inan-aman mak tenki sai modelu diak ba labarik sira, hatene fase liman loloós ho sabaun, ne’e mak sei kontribui ba redusaun taxa mortalidade labarik no moras oioin”, Vise-Ministru Saúde, Bonifacio Maucoli Dos Reis, ba jornalista sira durante serimonia komemorasaun loron mundial fase liman iha Palásiu das Sinzas, Kaikoli, Kuarta (21/10).
Membru Governu konstitusionál da-ualu ne’e esplika, Timor-Leste selebra loron mundial fase liman 2020, ho tema global hijiene ba ema hotu, tamba mundu iha mudansa bo’ot iha paradigma ijiene liman, desde mosu surtu pandemia COVID-19.
“COVID-19 lori implikasaun bo’ot, liu-liu fo mai ita oportunidade osan mean atu hadi’ak ita nia konhesimentu no hahalok relasiona ho ijiene liman”, afirma Governante ne’e.
Tamba ne’e, Maucoli kontinua enkoraza ba ema hotu atu mantein kuidadu ijiene fase liman lolos ho sabaun hodi proteje labarik sira husi moras oioin ne’ebe bele fo ameasa ba moris.
“Fase liman ho sabaun mak maneira simples no baratu liu atu mantein promove ijiene liman”, tenik Maucoli
Enkuantu kada tinan mundu tomak sempre selebra loron mundiál fase liman mak monu iha loron 15 fulan Outubru. Emj8
