PR Horta-JSMP Diskuti Servisu Funsionamentu Tribunal no Prokurador
Naunil Media (Díli), Prezidente Repúblika (PR) José Ramos Horta ho Judicial System Monitoring Programme (JSMP), diskuti kona-ba pontu ne’ebé durante ne’e JSMP deskobre iha seitor justisa liu-liu servisu funsionamentu iha Tribunal no Prokurador.
Kestaun ne’e hato’o husi Diretora Ezekutiva Judicial System Monitoring Programme (JSMP), Ana Paula Marçal ba jornalista sira hafoin diskusaun ho Xefe Estadu iha Colmera, Kuarta (14/09).
“Pontu ne’ebé ohin ami diskuti ho Prezidente Repúblika mak kona-ba ami nia deskobrementu iha seitor justisa no lejislativu liuliu servicu funsionamentu husi tribunais sira no mós prokurador sira, defendoria públika tuir saida mak durante ne’e JSMP observa, inklui mós ba iha funsionamentu Parlamentu Nasionál ne’ebé durante ita boot sira hatene ami halo monitorizasaun regularmente ba iha seitor rua ne’e,” dehan Diretora Ezekutiva JSMP Ana Paula.
Iha enkontru ne’e parte husi JSMP mós hato’o sira atividade kona-ba programa foun ida ne’ebé sira harii iha 2020 kona-ba assistensia legal ne’ebé sira mós hato’o ba Prezidente Repúblika no mós ba vitima sira ne’ebé durante JSMP ffo assistênsia saida mak presiza sira hato’o ba Prezidente Repúblika.
Ana Paula hatutan, Kona-bá servisu Parlamentu Nasionál nian ne’ebé durante ne’e produz lei, JSMP hato’o hotu ba PR nune’e mós parte JSMP apresia Parlamentu Nasionál maibé sira hakarak iha futuru mai konsultasaun públiku ne’e presiza no kontinua ba lei sira nune’e bele refleta realidade Timor nian no depois tenke iha peskiza bainhira atu hamosu lei ruma tenke halo peskiza nune’e lei ne’e labele dook husi realidade maibé tuir duni ka hatan duni realidade Timor nian.
Ezekutiva JSMP ne’e espera katak Prezidente Repúblika bele influénsia iha seitor hotu-hotu tanba liu husi vizita ne’e sira mós hato’o dezafius ne’ebé JSMP hasoru durante sira nia servisu nune’e bele ajuda sira iha futuru bele servicu hamutuk ho JSMP karik sira iha futuru sei halo aktividade hamutuk.
Nia dehan objetivu vizita Prezidente Repúblika ne’e hanesan atu haree direitamente servicu JSMP no mós rona durante sira nia servisu ne’e oinsá, observasaun sira nian ba iha seitor justisa no mós ba iha lejislativu ne’e mak sira hato’o ba Prezidente Repúblika, no sira fiar katak ho diskusaun ne’ebé sira ko’alia hamutuk ho Prezidente Repúblika bele kontinua iha futuru. *Jos
