Xina Mantein Apoia TL Kombate COVID-19
Naunil Media (Díli), Embaixadór Xina iha Timor-Leste (TL), Xiao Jianguo, deklara Xina mantein pozisaun hodi fó apoia Timor-Leste ba kombate virus global Surtu Corona Virus Disease 2019 (COVID-19), apresia ba esforsu Estadu no Governu Repúblika Demokrátika Timor-Leste (RDTL), tanba to’o ladauk rejista kazu ema mate.
Afirmasaun ne’e, reprezentante Governu Xinés iha Timor-Leste, Embaixadór Xiao Jianguo, hafoin sorumutuk ho Vise-Primeira Ministra (VPM) ba Asuntu Solidariedade Sosiál no Inkluzaun (MSSI), Armanda Berta dos Santos, iha edifísiu MSSI Kaikoli, Segunda (17/08).
Diplomata Xina iha Timor-Leste, Xiao Jianguo, deklara Xina mantein apoia fasilidade no seluk-tan mai Timor-Leste hodi halo prevensaun hasoru propagasaun Surtu COVID-19.
“Hau hasoru malu ho Vise-Primeira Ministra hodi koalia kona-ba Xina ninia apoiu mai Timor-Leste oinsa atu kombate COVID-19” informa Embaixadór Xina iha TL, Xiao Jianguo.
Tuir Xiao Jianguo, em jerál situasaun iha Timor-Leste kontinua la’o di’ak, maske infrenta hela pandemia mundiál (COVID-19).
“Agrasede no apresia ba Timor-Leste ninian esforsu tomak hasoru Surtu COVID-19 ne’ebe ho sériu teb-tebes, maibe husu ba ema hotu-hotu atu nafatin kuidadu án”, apresia Xiao Jianguo.
Governu Xina liu husi nia embaixada iha Timor-Leste, iha (05/06) tinan 2020 ne’e, apoia ona ekipamentu prevensaun COVID-19 hanesan maskra 40.000, hand sanitizer 560 ba Munisípiu Manatuto no Ministériu Administrasaun Estatal.
No iha loron 24 fulan Junñu tinan ne’e, Xinan kontinua apoia maskra 5.000 resin no hand sanitizer ba Parlamentu Nasionál (PN).
Iha loron 01 fulan Jullu tinan ne’e, Governu Xina liu husi nia embaixadór Xiao Jianguo, apoia maskra ba Ministériu Ensinu Superior Siensia no Kultura (MESSK) ho maskra 40.000 no hand sanitizer 560.
Antes ne’e iha fulan Abril tinan ne’e, Governu Xina apoia ona ekipamentu prevensaun COVID-19 nian ba Ministériu Saúde (MS) mak hanesan termometru, luvas, maskra, hand sanitizer no seluk-tan. Emj1/Emj2
