Lere Triste Lakon Kapitaun Fragata Ida Husi Komponente Naval
Naunil Media (Díli), Xefe Estadu Maior Jeneral FALINTIL-FDTL, Majór Jeneral Lere Anan Timur, sente triste tanba lakon-tan ofisial superior FALINTIL- F-FDTL kapitaun fragata ida husi komponente naval.
“Falintil Forca Defesa Timor-Leste husi komponente naval kapitaun Fragata Joao Francisco Fatima hetan atakasaun no hakotu iis mais ou menus 05:00 Otl, wainhira hala’o hela exercio fiziku iha tasi tolu”, Majór Jeneral Lere Anan Timur, ba jornalista sira iha Kuartel Jeneral Fatuhada, Kinta (22/10).
Eis-gerileiru rezistensia komandante rejiaun um ponta leste, informa matebian ne’e uluk nia moras kedas lori ba halo konsulta tiha iha singapura fila mai rekopera oitoan, moras fila-fali.
“Horbainruak Tersa-feira (20/10) reuniaun ho komandante sira, matebian refere ho hau, i matebian refere fo mos nia pontus revista iha reuniaun ne’e”, haktuir Majór Lere Anan Timur.
Lere Anan husu ba família, tantu kolega sira tenki pasiensie tamba mate ne’e hanesan dalan uniko ba ema hotu moris iha mundo.
Saudozu kapitaun Fragata João Francisco De Fatima ‘Buka Tuir’ moris iha Loi-hunu iha loron 10 fulan Outubru tinan 1969, husik hela feen no oan nain ha’at mane nain rua no feto nain rua. Nel/Pau
