Prezidente Komite 12 Novembru Grigorio: Joven Tenke Kria Páz no Estabilidade

Fahe Tutan

Naunil Media (Díli), Prezidente Komite 12 novembru Grigorio Saldanha ‘Mouris’, husu joven sira tenke kria páz no estabilidade hodi kontribui ba prosesu dezenvolvimentu iha Timor-Leste (TL).

Prezidente Komite 12 novembru Grigorio Saldanha ba jornalista sira liuhusi diskursu iha serimónia komemorasaun 12 novembru 1991 ba dala-29, iha semitériu Santa Krúz, kinta (12/11).

“Ha’u husu ba joventude sira kria unidade, badinas ba eskola, fó solidariedade, servisu no respeita malu tenke hahú moris ho ambiente foun ne’ebé nakonu ho toleransia tamba Timor-Leste nia futuru iha joventude sira nian liman’’, dehan Grigorio.

Grigorio afirma, joven tenke kira páz no estabilidade hodi sai hanesan autór ba dezemvolvimentu, hodi kontinua defende heroi sira nia luta ne’ebé husik hela.

“Joventude Loriku Asu-wa’in sira-nia luta fó hanoin husi luta bei-ala sira-nian no luta kontra kolonialista Portugués to’o mai iha luta ne’ebé organiza husi Komite Sentral Fretilin (CCF-sigla portugés), ne’ebé depois dezenvolve di’ak liu tan husi líder Kay Rala Xanana Gusmão nomós tulun husi parte igreja katólika hodi luta kontra hasoru okupasaun Indonézia”, tenik nia.

Iha fatin hanesan materestu 12 novembru Alexandre da Costa ‘Alex Samurai’ hatutan, nu’udar mate restu komite 12 novembru husu joventude sira atu kontinua hametin paz iha Timor-Leste.

“Ohin ita hanoin fali ba ita-nia heroi sira nia luta naruk, liu husi fakar raan no mate ba ita-nia rain ida ne’e. Tanba ne’e nudar joventude presiza kria unidade, dame, domin, paz no estabilidade iha Timor-Leste’’. tenik Alex. Dul

Leave a Reply

Your email address will not be published. Required fields are marked *