Aban, PR Lú Olo Sei Hala’o Vizita Traballu ba Munisípiu Ermera

Fahe Tutan

Naunil Media (Díli), Prezidente Repúblika (PR), Francisco Guterres Lú Olo, aban Kuarta (18-19 Novembru) sei hala’o vizita traballu ba Munisípiu Ermera.

Naunil Media asesu Komunikadu Imprensa liu husi pájina espesial Presidência da República Democrática de Timor-Leste, Tersa (17/11).      

Durante loron-rua iha Gleno, Prezidente Repúblika sei haree ho besik kondisaun eskola públika, sentru saúde, atividade produtiva no halo diálogu hodi rona no hatan preokupasoins husi autoridade lokál no komunidade kona-ba dezenvolvimentu nasionál.

Prezidente Repúblika sei vizita Grupu Produtivu Kulat, prosesamentu no distributor fini ikan, Eskola Báziku Sentral  10 abril,  Eskola Nino Konis Santana no kuda ai simbolikamente, Sentru Maternidade, Eskola Sekundária Jerál Hélio Pina “Maukruma” no diálogu ho autoridade lokál no komunidade.

Membrus Governu ne’ebé sei akompaña Prezidente Repúblika mak Vise Primeiru Ministru no Ministru Planu no Ordenamentu, Ministru Koordenadór Assuntu Ekonómiku, Ministru Asuntu Parlamentares no Komunikasaun Sosial, Ministru Administrasaun Estatal, Ministra Saúde, Ministru Edukasaun, Juventude no Desportu, Ministru Obras Públikas, Ministru Turismu, Komérsiu no Indústria, Ministru Agrikultura no Peskas, Ministru Petroleu no Minerais, Sekretáriu Estadu ba Formasaun Empregu, Sekretáriu Estadu ba Terras e Propriedades, Sekretáriu Estadu Kooperativas, Sekretáriu Estadu Juventude no Desportu no Sekretáriu Estadu Arte no Kultura. Molok ne’e, Prezidente Repúblika halo ona vizita traballu iha Munisípiu Viqueque, Covalima no Lautem.

Iha fulan dezembru 2020, Prezidente Repúblika sei hala’o vizita traballu iha Munisípiu Baucau. */Pau

Leave a Reply

Your email address will not be published. Required fields are marked *